ياللي على شاني تسوق المناجيب=اسمع كلامي زين قبل المواجه
العرف وهبه والقصايد مناديب=رسايل العراف في كل حاجه
خصٍ ليا كانت من اهل التجاريب=يلقى فطين القلب فيها علاجه
وانا ابذل المجهود واحاول اصيب=عين الهدف والا تجي في حجاجه
وان كان ماصابت هدفها على الطيب=علقتها مالي ومال اللجاجه
يعذرني الطيب وراع العذاريب=جعله يولع في غيابي سراجه
صدي عن النمام حكمه وتاديب=اليا سفهت اللاش زاد انزعاجه
اللي تربى فوق شذب العراقيب=ومايشذب العرقوب غير الحلاجه
لو طال ريشه ماتطول المخاليب=وش عاد لو يطّول جناح الدجاجه
ماهو مطيرها لروس المراقيب=لافوزتبه صار فيه انعواجه
قولوا لبو وجهين شين الهناديب=اللي يبا الدنيا تصير بمزاجه
بعض الهقاوي ماوراها مكاسيب=وبعض الحلوم المستحيله سماجه
عممتها على نظام المكاتيب=واللي يحس ابها يدوّر خراجه
ومحشوم منها اللي يعرف المواجيب=ذخر القروم اللي بعيدٍ رواجه
اللي كسب من منهج الدين تهذيب=ومن اعتصم بالله تعلت دراجه
ماهو على ربعه قريّب محاضيب=ولاهوب على الدبكه يثّور عجاجه
ولايلتفت لمروجين الاكاذيب=ولاكل سوقٍ يشتري من حراجه
وختامها الظن الردي فى الاصاحيب=يكسر غلاهم مثل كسر الزجاجه
مع تحيات =ضاوي العصيمي
« آخـــر الـــمـــشـــاركــــات »
الى من يهمه الامر (جديد)
العرض الشجري