من ديوان الشاعر / نــــــجــــــم الســــــمــــــريـــــــن

[نجم السمرين]

سريه مع سريه

تدري وش يفرق خيالك عن خيالـي=كنت اسوقه لك سريـه مـع سريَّـه
وتدري وش تفرق حروفك وارتجالي=ألعبـه لاجيـت لـك فيَّـه وفـيَّـه
وتدري وش يفرق سؤالك عن سؤالي=لازفرت الشوق قـم واسمـع دوَّيـه
وتدري وش يفرق وصالك عن دلالي=شلت عَنْكَ الضيـق ورديتـه هديَّـه
وتدري وش يذبح عزيزين الرجالـي=لاطعنك الوقـت مـن كـف أجوديَّـه
وتدري وش تعني طعونك واحتمالـي=لو يشيب الراس تبقـى بـي نديَّـه
وتدري وش يعني وقوفك وارتحالـي=هـذا تسـأل عَنْـهْ قلـب العامريَّـه
وتدري وش يشفع لكفِّـي لاطرالـي=نفسي اللي من فضـل ربـي تقيِّـه
ماعرفـت العـب بقلـب ٍ مابكالـي=ولاتحايلـت النطيـحـه والـرديَّـه
كنت اظنك فـي حياتـي راس مالـي=وكنت اشوفَك فرحت العمـر وسميَّـه
لين ماركَّـزت فـي ظهـر الليالـي=خنجـرك واليـوم لاتبكـي علـيَّـه
احـرق اوراق الغـلا لاجـا مجالـي=مثل ماروحي عـن الماضـي غنيِّـه
لو كذبت وقلـت لـك مرتـاح بالـي=لاوربـك جمرتـك بالـروح حـيَّـه
ماهو من حـر المفـارق واشتعالـي=لا ولا مـن طعنـة الخايـن خويَّـه
غير لاشفتـك علـى فالـك قبالـي=تلعب المسحوب في حـوض المنيـه
كنك اللي شلت روحي فـوق صالـي=خـوف لاتاخـذ ورا مافـات كـيَّـه
غالي ٍ تبقى وتفنـى وانـت غالـي=مانبـي تفتـح ملـفـات القضـيَّـه
يرحم الله وقتك اللـي قـد مضالـي=ويرحم الله من لفاك بْ طيـب نيَّـه