من ديوان الشاعر / نــــــجــــــم الســــــمــــــريـــــــن

[نجم السمرين]

نواقيس الفرح

البارحه عقب الغياب بْ حين توديـع الغـروب=والشمس مع قرص الشفق من قبل ساعه غاربه
أرقبت في روس الطوال اللي بها القلب مْغَلـوب=في ساعة(ن) دقَّـت نواقيـس الفـرح عقاربـه
واركيت راسي للورق واطلقت فكـري للهبـوب=أطـرد ورا هجـس القصيـد آحايلـه واقاربـه
إلين ماطاح الـذي كنـه مـن الغيـم مْحَلُـوب=في وسط صندوق الضلـوع الصافيـه مشاربـه
حرف القصيد اللي على قيمة جلاليبه مْحَسُـوب=إمـا يجمـل صاحبـه والا يوطي شـاربـه
وانا يمين الله فلا تحسب علـى مثلـي بنـوب=أبـا ارتقـي بـه للنجـوم الفاهقـه المتقاربـه
في ذكر ربعي هم حزامي يوم صيحات الجنـوب=اللي يمانيهـم مـن حْيـاض المنيـه ضاربـه
آلاد روق أحفاد راشد مرويـة بطـن الجـروب=لاثارمن عج الدخـن واخـلاق ربعـي خاربـه
هم لابتي وافخر به في كل حدب وكل صوب=الـورع منهـم ساعـة الهـدة يمينـه داربـه
أهل العطا واهل السطى واهل المنايح والحروب=واهل الكفوف الساقيه مـن جودهـا والشاربه
لولاي اخاف الحق الساني من ورا قولي ذنـوب=قلت المكـارم حالـف(ن) حنَّـا بَحَـرْه وقاربـه
مع عزوة(ن) نفخر بهم ربعي مقابيس الدروب=اللـي عـروق جْدودنـا وعروقهـم متقاربه
قوم القعيد وابن وابل وابن دربـاس وجنـوب=لنا مع ال شجاع والدلبـه عـروق(ن) ساربه
كلمة وفـا مانـي بنفَّـاخ الشواكـل والـذروب=ماميَّـز المستعربـه واجحـد فعـول العـاربـه
في ليلة(ن) يشهد لها الصادق على عين الكذوب=يـوم اليديـن القاصـره نياتـهـا متضـاربـه
بقيادة الشيخ الذي من حكمـة الـرب مْحَبُـوب=ياسعود ياسعد الحروف اللـي لمدحـك طاربـه
ياصاحب الراس السِّطي ياصاحب الصدر الرحوب=يامـن ينابيـع المكـارم فـي يمينـك شاربـه
محبتك ماهي حكي غيـر انهـا وسـط القلـوب=آقولها وانـا الـذي لاقلـت قـول(ن) عاربـه
يوم انها تصعب على من لاوطى غير الخبـوب=انت الذي راس الجدي مبطي وواطـي غاربـه
ويوم انها تقصر على من همهم كرب الجيـوب=انت الـذي وجهـك بمـدات الكريمـه كاربـه
عهد(ن) علي لو للصخاء والنايفه والجود ثـوب=مافيه متن(ن) في حضورك قبـل متنـك قاربـه
لادام كف(ن) مايحوش من الزمن غير العيـوب=ولاعاش راس(ن) مايشوش لعزوتـه واقاربـه