ياشاربين التتن بالله على الهون..ترى الليال السود..

[خالد المقاطي]

المشاركة الأصلية كتبت بواسطة عايض زوير المقاطي

كالمعتاد ,, متواضعه أضعها

بين أيديكم..

متمنيا وطامعا

في أن تنال الرضى

ياشاربين التتن بالله على الهون=اليا متى والنفس تتبع هواها
اليا متى بالحال والمال تقنون=المهلكه.. سقم القلوب وبلاها
ياشاربين التتن لن كان توحون=ترى الليال السود يدرج رحاها
وترى العمر لو طال ماهوب مضمون=لابد في ساعه تلحف ثراها
يغويكم الشيطان وبليس ملعون=يمشي مع العالم ويبحث خفاها
وبعض العرب حبله مع أبليس مقرون=مطية لبليس يركب علاها
ويسوقها,, من دون, في دون, في دون=وليا حداه الوقت ..يمه حداها
ياشاربين السم وش تستفيدون=من سلعة للنفس تجلب غثاها,؟
كود الوهن والهم والغم وغبون=والعله اللي ما عرفنا دواها
اخذوا العبر من ناس فيها يعانون=وبين الحيا والموت يومي رشاها
كم واحدن همه فالأضلاع مكنون=ومن زايد الجلطات زايد.. عناها
لو تجلط قلوب البعارين..من دون=شكه تبا ترثع,, ويلعن ثواها
وترى الحياة دروس وعلوم وفنون=ومن لا تغداها بيمسي عشاها
والكيف ياهل الكيف ماهوب غليون=ولا سقارة سم تونس شقاها
الكيف واهل العرف لا شك يدرون=برية للنفس تروي ضماها
في دلة تجدى على الجال بالهون=من وارد البغداد قرم قناها
وبهارها المسمار.. والهيل موزون=واحلى من البير المسماه ماها
وياما حلا المجلاس, مع جرة لحون=يطرب لها المهموم لا من حداها
في مجلس فيه النشاما يهدون=مثل الحرار اللي هوت من سماها
مقعادهم عن سكة النقد مصيون=ماكر حرار القوم.. واللي لفاها
هذي غناة الروح,, والروح بالشون=كلن يدور في حياته غناها
وختامها تكفون, تكفون, تكفون=ترى الليال السود تدرج رحاها

ابو زوير ( مقاطي الحجاز )


والله اني اخذ كم بيت ولاكن خقت اني اسهب

واظلم البوت الباقيـــه

جزاك الله اللف خير .. ( والله انه يكتبلك فيها الاجر )

جزاله محكمــه من شاعر فذ







تقبل تحياتي واجل اعترامي



اخوك :