على عــيني

[هلال العتيبي]

احلّق على متن السماء والخيال جناح=خيالي لياضاق الفضاء لك يوديني
لك اسرج خيول الفكر والهاجس الجماح=خيالي بعيد بعيد يمّك يسريني
احث الخطا لك كلّما شفت برقٍ لاح= احس إنّ هذا البرق بالذات يعنيني
عيوني جزيرة حب واطيافك السواح=على عيني اطيافك تهافت على عيني
اشوفك هنا وهناك وهناك لجل ارتاح=اسافر اروح اجي خيالك مخاويني
غرامك مدينة غامضة مالها مفتاح=لها سور بابه نور دايم يناديني
ليا رحت ناداني ولن جيت صد وراح=دواليك اروح تجين اجيك وتصديني
إذا طال صدّك طار سرب الحمام وناح=وتذبل غصون الشوق داخل شراييني
أعدّ الخرز مرات يابلوة المسباح=نكبته وقطّعته وهو قطّع يديني
على شاطي الحلم انتهت رحلة الملاح=وداعاً وداعاّ حلمي وماضي سنيني
هنا يمكن اودّع جروح الهوى ياصاح=واغيّر مساراتي واغيّر عناويني
إذا كان هذا البنك يخسر بدون ارباح=ولوكان ديكوره ورود ورياحيني
وإذا كان هذا الدرب عصف ومطر ورياح=رجاءً رجاءً غادتي لاتحبيني
أنا عاد ناقصني سهاد وسهر وجراح=تكفيني جروحي جروحي تكفيني