الهنوف الي خذت قلبي وانت قلي رهيف

[ابراهيم الزراقي]

هذه قصيده تحكي عن نفسها اترككم معها

الهنوف الي خذت قلبي وانا قلبي رهيف=لاحقه فالوقت همن لايغيب ولايزول
ماتولع غير فيها يوم كلن له وليف=يعشقه ويقول فيه من القصايد مايقول
كيف؟لاتسأل ولاتنشد ولاتهرج بكيف=مساله صعبه ومال المسأله عندي حلول
اذبحتني بالهدب والطول والخصر النحيف=واسحرتني بالجمال الوايلي بنت الاصول
الجمال الي تميزبه ترى ماله وصيف=والاصاله ورث اهلها مالها عنها عدول
جابها شيخن على الطالات مايرضى الرديف=وده يكون الوحيد الي على ضهر الذلول
صيرمين منطنخ بالطيب والساس العفيف=ماعرف هم الليال ولاحسب ثقل الحمول
يوم ناداها وجاته مشيها مشي الكفيف=واخضعت له قالت انته غايتي بين الزحول
من عرفها ماجهلها (ماجهلها الا ضعيف)=ومن نساها جعل ماله عند خلق الله قبول
حبها فالدم من نجران لين اقصى طريف=ومن بحر جده ليا بحر الخليج اهل الفعول
اسمها دار السعود الي لهم فعلن كليف= الملوك الي حموها بالسيوف وبالخيول
السيوف الي معاهم تهدم الضلع المنيف=ماحملها كل رجالن على البيدا خجول
والمهار الي علاها مابعد جاها عسيف=ماعسفها غير شيخن يعرف يصول ويجول
اهتموها مسقمين الضد فاليوم العصيف=لين صارت ديرتن وحده بعد كانت فصول
وابذلوا فيها المراجل لين صار الصمد ريف=ثم ساد الآمن فيها كلها عرضن وطول
ترمز النخله لخير وللعدل حدٍ رهيف=في علمها الشامخ الي ماتنكس كل حول
يابلادي يابلاد العز والدين الحنيف=يابلادن في روابيها ضهر نور الرسول
من يلوم القلب في حبك ترى ماهو شريف=ومن يساوم في غلاتك مامعه عقل (مهبول)
والله اني ماعشقت الا بصدق ودون زيف= ولاكتبت الا قصيدن يدخل العالم ذهول
واتتي اكبر معجزات الشعر دام العز سيف=والقصايد تفتخربك والحكي عنك يطول
ان بغيت امدحك مدري وش اقول او وش اضيف=وان بغيت اوصفك مدري وش اضيف او وش اقول
انتي اكبر من قصيدة مدح من قلبن نضيف=وانتي اعضم من مشاعر شاعرن وصفه يطول

شعر ...ابراهيم الزراقي