مزهريّة

[هلال العتيبي]

لو بعينك ليا مريت ردّ السلام=سنّة الهادي وشرع العليم السميع
وين رايح تبختّر مثل بدر التمام=القمر لويجي جنبك حرام ليضيع
وانت تمشي تهادى مثل مشي الغمام=لاثقيلٍ بطيء ولاخفيفٍ سريع
غصن وردٍ تهصّر كن ّ مابك عظام=خايف الشمس لاتحمى عليك وتميع
ان توجهت قبلة عطرك يفوح شام=خافوا الله فينا عاد وامشوا جميع
كل خطوة غرور وكل نظرة سهام=شف ضحايا عيونك كم صويب وصريع
ليه مافهّموك ان التجنّي حرام=وان قتل البني آدم رهيب وشنيع
تبت إيد التغلّي والدّلع والخصام=اثر ماللهوى والحب عندك شفيع
راح مركب غرامي في بحورك حطام=مدّ حبّك فظيع وجزر حبّك فظيع
من غرق في بحر عينك عساه الرحام=لامكان لدخيل ولامقام لمنيع
راهن احلام عمري تحت حدّ الحسام=كن قسوتك ذيب وامنياتي قطيع
مير طبعي عنيد ولااقبل الانهزام=لاتحسب انّي اتوه بعجاجك واضيع
ودّي اعاملك بالطيب والإحترام=وارفعك للكواكب فالمكان الرفيع
وودي استنسخ الشمس وخيوط الظلام=وازرع الشوق لك في كل وادي وريع
لجل ازخرف لك اشعاري بعذب الكلام=واقطف احلى الزهر من جال روضٍ بديع
انته اسمك على صدر القصيدة وسام= مزهرية وباقة من ورود الربيع