_ استغاثة _ محمد بن سمير الحزيمي

[عنـاد الحزيمي]

السلام عليكم ورحمة الله وبركاته

هذه احدى قصائِد الشاعر : محمد بن سمير الحزيمي

استغاثه ..

نجم السويبع شيف والوسم قربّ=والقاع ممحل يابسات ٍ طبوقـه
يارب من رحمتك نطلبك مطلّبّ=طال الزمن والنبت قلت أوفوقه
تامر بمزن ٍ مدلهم ٍ من الغربّ=ليا أقبل من المنشى حقوقه صدوقه
بالخير والرحمه وفضلك موهبّ=ترعد رعوده مع تلاعج بروقه
وليا إحتمل حمله من الماء ونصبّ=يطقه الشرقي وحمله يسوقه
ويصب ماه ليا تعدى حضن صبّ=غيث ٍ ثجاج بدون شيء يعوقه
يمطر وينصاء نجد بهداية الربّ=كن الجبال السود فيه مخلوقه
وكن القنابل فيه والنار تشتبّ=وبرقه من أقصى ضلم يكشف خنوقه
والناس من لونه تخاف وتغاربّ=غريب من مابه وعذب ٍ بذوقه
وسحم الذيابه من رعوده تقانبّ=وباق النفوس تقول منه مخنوقه
ليا أوحيت وبله قلت صلف الهوى هبّ=والأرض من وبله تقول معزوقه
يمسح عقوم اللي يسكر بها الدربّ=ويظلم بجو الكون والشمس فوقه
والضلع يشرب وجلد القاع يشربّ=وسيله مع الوادي وساع ٍ فتوقه
وطرايح الوادي بسيله تقلبّ=ومثل الخيام البيض غثو ٍ يحوقه
ونبت ٍ شواه القيض والوقت الأشهبّ=يسقيه من وبله ويحيي عروقه
وتصبح فيافي نجد روض ٍ معشبّ=ليا مرها العساس نبته يشوقه
كن الوطى مكسي بزل ٍ مهدبّ=جنه لراع النوق بأطراف نوقه
وبعض الزواحف فالزماليق تنشبّ=ويلعب به القمري ويكثر خفوقه
وريحه علاج اللي تعثر به الطب ّ=وتدله أنفوس أهل النفوس الحموقه
وراعي سهاف القود يدله ويطربّ=وريح الخزامى والطعم في غبوقه
وعقبه تساقيه السحايب على غبّ=من وادي الخرمه ليا أطراف لوقه
لين العلف فالسوق ما عاد يجلبّ=يعفن ورى الكبرات ما طب سوقه
وش ذنب مخلوق ٍ بليا مرتبّ=مسلم ومؤمن والليالي صفوقه
يتبع حلاله في رجا الله ويتعبّ=ومن القساوه ناشفات ٍ إشدوقه
وش ذنب حيوان ٍ مغر جلد وأجربّ=ومن العجاج منفجات ٍ إرموقه
الناس تذنب ماترفع عن الذنبّ=ومن الحسد كن الحزوم محروقه
كل ٍ بلوحه ذنب ماينتحسب ّ=لكن بالرحمه عبادك شفوقه
مافيه شين عندك يارب يصعبّ=الخالق أنته والنفوس مخلوقه
يالخالق الفالق ويافارج الكربّ=يامولج ٍ ليل الدجا في شروقه
يامسير دم الشرايين فالقلبّ=فأضيق عروقه مستمر ٍ دفوقه
يا الواحــد الفرد الصمد منبت الحب ّ=يارازق ٍ حوت البحر في عموقه
تجعل ملك يمناي بالخير يكتب ّ=وتجعل ملك يسراي عنه مغلوقه
وتقبل كلام اللي كلامه مرتب ّ=وأنت الذي تسمع وتفهم طروقه

اتمنى ان اكون وفقة في طرحها

دمتم جميعاا ً