قصيدة مدح في قبيلة عتيبة العريقة ، و ردّي عليها

[سعود بن سعد الحافي]

الشاعر و الراوي الكبير المعروف ( فواز الغسلان )

قال القصيدة التالية ( مدح في قبيلة عتيبة العريقة )

و كان لها صدى إيجابي لدي ،

إليكم قصيدة الشاعر فواز الغسلان ، و صداها قصيدتي ،

من طاح ماحوله من الناس عتبان = او يسمعه رجـلٍ خوالـه عتيبـه
فهو طايحٍ رجواه في كان ما كـان = يلقى الفزع والا حدر في مصيبـه
شهادةٍ يشهد عليها ابـن غسـلان = ومن كان وسط الناس يدرى نصيبه
من عقب ماخاويت عالم وعربـان = شباب واللي لاح بالوجـه شيبـه
ولقيـت بالعربـان زودٍ ونقصـان = مثل الخيـول ملافحـات السبيبـه
لكن سنام اهل الفزايـع والاكـوان = واهل المواقف بالوقوت العصيبـه
في روق مع برقا صواريم عدنـان = اللي بوقت الكون تجـدع حريبـه
لاصاح صيـاح الاجاويـد بلشـان = وبيبان حل القـوم ماهـي قريبـه
يشكي دروبٍ به ثمانيـن شيطـان = وجرحٍ عجز ياصل حراوي طبيبـه
ونخواه ضاعت بالهواء تقل دخان = مع عاصفن بالصيف يدفـن قليبـه
ياكثر من يبقى من الناس نعسـان = او قال بلشات العرب وش نبي بـه
الا العتيبي ينفجـر فيـه بركـان = وكبده على الفزعات يقدح لهيبـه
اصغرهم اللي بالفزع طير حـوران = والا تشوفه مثـل سرحـان ذيبـه
حاديه طيبٍ عايشٍ طول الازمـان = مع والـدٍ يشفـق لطيبـة نسيبـه
وقلبٍ بموج الطيب يسقيه شريـان = وجيلٍ قديمٍ شـاع بالنـاس طيبـه
شبابهم تغني عن النـاس شيبـان = وجنودهـم فاقـت مراتـب نقيبـه
ولا طاع بدروب الردى نصح كوبان = والطيب لا مطمع ولا هو غصيبـه
لاشـك مالـه بالمهاريـب بيبـان = ونفسٍ تشوف الهون عار ومعيبـه
والناس كله بالفراغـات شجعـان = وتسمع هروجٍ بالخلايـق عجيبـه
والكود لطبوع المخاليـق ميـزان = لا قام وقت الكود يقـرى خطيبـه
يظهر لك اللي يحتمي تال الاظعان = ويمناه تغني عن جيوش وكتيبـه
يذري على الشده ضعافى ويتمـان = ورجلٍ وقع بالناس ساقه حطيبـه
ونسل الردى يبني مخابي وجدران = ويشرب من دلال الفزايـع سريبـه
من لاذ به في ساعة الكود خسران = ويابعد مشرق شمسها عن مغيبـه
ولا لي مع العتبان مطمع وخـلان = لاشك جحد الطيب يانـاس خيبـه
وانا اشهد انه بالفزع شانهم شـان = ومن يجحد اهل الطيب ربي حسيبه
وليت العرب عند المفازيع عتبـان = وياقرب طيب اللي خوالـه عتيبـه

و جاء ردي كما يلي :

علما أن أحد الاشخاص رد على الغسلان بعبارة

( كبرّت روس العتبان يا فواز )

و جاء ردي بشكل مزدوج ،،

مما جـرا و إنقـال سخّـرت قيفـان = و ارسلت مرسولـي لقافـي يجيبـه
عوّد لي المرسول بالحـال عجـلان = قال الطلب جبناه لـك وش تبـي بـه
قلت أرسله للي لهـم قـدرٍ و شـان = فـواز ذاك اللـى دروبـه صعيـبـه
دربه وعر مـا يعبـره كايـنٍ كـان = يتعب على دربـه ركايـب صليبـه
فواز ابن غسلان يـا نسـل فرسـان = مدحـت و الممـدوح ربعـي عتيبـه
اللى لهـم بالمجـد رآيـه و عنـوان = كل العرب تقـراه و كلـن دري بـه
شهادتك تبقى علـى الصـدر نيشـان = يفخر بها المعنـي شبـابٍ و شيبـه
يجبرني الموقـف علـى رد عرفـان = معه التحايـا و الثنـاء فـاح طيبـه
من يفعل الاحسـان نجزيـه إحسـان = و من قال قول الحق يا طيـب طيبـه
لو كـان يالزيـزوم بالـرد نقصـان = منك العذر والعفـو رسـم الضريبـه
موقفـك يافـواز ظاهـر للاعـيـان = موقف شرف بلعون ماهـى غريبـه
حيث ان لكم تاريخ فى وسط ديـوان = إمسطر و مشهـود مـا ندعـي بـه
طيب وكرم و أمجاد يا الحر شقـران = محـدٍ مـن العربـان والله يعيـبـه
لو كان بعض الناس راضى و زعلان = وأحدٍ على الضلعـان يحفـر قليبـه
كلن على مبـداه ضـاوي و شقيـان = و كلـن بمجهـوده يحصـل نصيبـه
و لو كان كبر الروس غايه وبرهـان = إن كـان للثيـران حـق و طليـبـه
شتـان مابيـن المعالـي و عــلان = مـا يقهـر المقهـور كـود الغليبـه
بيّنتهـا بيتيـن والقـصـد لـفـلان = اللـى علـى رده لطمـنـا نحيـبـه
و آعود للغسلان مع غصن ريحـان = اللى يعـرف سلـوم نـاس عريبـه
راع الوفا و الطيب والعز بـه بـان = اللي على العليا مكانـه رضـي بـه
شهمٍ شجاعٍ فذ مـن سـاس شجعـان = يا سِعد منهو من العرب يعتـزي بـه
دايم على العسرات ترجح لـه أوزان = أهـون فعولـه كايـداتٍ عصيـبـه
ساس الكرم و المجد من عهد و ازمان = ساسـه مجيـد و زاد فوقـه نجيبـه
مـا قلتهـا يالربـع زورٍ و بهتـان = ولا مقصدي أنشـر دعايـه مريبـه
الأمـر محسـوم ولا فيـه إعــلان = مـا يذكـر الياقـوت مثـل الزبيبـه
و صلاة ربي عد مـا هلـت أمـزان = دنّـت رعايدهـا و سيّـل شعيـبـه
على النبي الهاشمـي نسـل عدنـان = اللـي الخلايـق كلهـا تقتـدي بـه