زارع الشوك

[هلال العتيبي]

يالله ياللي بأسمك العبد يآمن=الطف بعبدك ياللطيف الحنونا
يامنزل السلوى ويامنزل المن=يآرب كن لي فالمهمات عونا
ثم اكفنا من شر عوجان الالسن=قومٍ بمقلاع النميمة رمونا
وياقلب هوّن لاتكدّر وتحزن=اهل النميمة والحسد مارزونا
خاب الحسود اللي يعذرب ويرطن=اعرف مداه وغرزة الدون دونا
لاتلتفت فيهم ترى الحاسد اهون=تاهوا عن دروب الوفاء واجحدونا
ياليتهم صدّوا عن دروبنا ازين=والاّ بمحمود الخصال اذكرونا
بعض العرب فالمخطية رعده يدن=وبرقه يباري ساريات المزونا
والصايبة عنها يجنب ويحرن=يشكي من اوجاع الظهر والمتونا
ان جت لوازم ربعه يحن ويون=ويقول ياكبر العسر والديونا
وزنه لياجات النوايب 100طن=إلاّ لياشاف السفر والصحونا
تشوف خفّة دمّه وضحكة السن=من قوم (قطّعلي)كبار البطونا
الجاهل اللي فالمجالس تفرعن=ودّه يحطم نايفات الحصونا
وانا اخبره مثل النعامة وأجبن=ينحاش لوترمش علاه العيونا
اليا زعل واحد بلا سبّة احسن=لازاد شيّ ولانقص مال ابونا
مااخذت من ماله كبر حبّة البن=مير الزمان وعرف مثله بلونا
ياكثر مانظلم من الناس ونظن=وياكثر ماظنّوا بنا واظلمونا
اغفر لنا ياخالق الإنس والجن=وادمح خطايانا وكثر الظنونا
القلب صاير للهواجيس موطن=متنوّعة من كل شكلٍ ولونا
اليامتى؟؟يازارع الشوك ولمن؟!=وين الزهر وين الثمر فالغصونا
لوتزرع المعروف والطيّب اثمن=الشوك مجناه القهر والغبونا