عقاب العنزي
ياسلام الله سلام ٍ من ضمير ٍ صافي = يعلم الله مانجيب السلعه الممنوعه
انت وش بينك وبين معمر القذافي = كل يوم تهاجمه في داخل المطبوعه
ابو لمار
مرحبا ترحيبة" تضفي بستر" ضافي = يالعميل اللي يجيب الطيب من ينبوعه
والله انّا مانعارض حذفة الحذافي = مير بعض الناس ياشينه وشين اطبوعه
عقاب العنزي
البقا وانته مشيت الدرب وانته حافي = عانك الله وانت واحد داخل المجموعه
يالثقيفي صاحبك وافي ومثلك وافي = ودنا نحل القضيه بالرضا والطوعه
ابو لمار
مامشينا الا بعلم الطيب للعرّافي = البلا في اللي منكّس للعرب قبوعه
الوفا لاهل الوفا ياصاحبي ينشافي = مير لاتنفخ في داخل قربة" مفقوعه
عقاب العنزي
والله ونعم ٍ بكم والصيت ماهو خافي = مار كلمتك الاخيره ماهي بمشروعه !!
بالقشر ودك تحطّم ذا الرقم ياكافي = يكتبك مستر جينس في داخل الموسوعه
ابو لمار
انت ماتدري عن النصاب والبلاّفي = والمصيبه كلمته بين العرب مسموعه
الخبل مايدري ان السيف للسيّافي = سيف ابو زيد الهلالي سلّته مفروعه
عقاب العنزي
تحت ظل آل سعود تناصر الاشرافي = حسبي الله نيّتك من داخلك منزوعه
لن حماك السيف قلنا ماعليك خلافي = خايف ٍ من ضربة ٍ مثنية ٍ مربوعه
ابو لمار
العرب ترضى بحكم العدل والانصافي = فيك شك انك مؤجّر واجرتك مدفوعه
لاتخاف الا على اللي في اللقا خوّافي = كان عمّك معجبك لاتختلف عن طوعه
عقاب العنزي
لن تكلمنا الصراحه والكلام الشافي = قمت تحذفني وتتهم نفسي المرفوعه
والله ان ّ مانهاب اليا احتما الميقافي = مير ليه اسب بنك الراجحي وفروعه
ابو لمار
مالحقك الشك منّي والقلوب انظافي = مير غيرك بالمظاهر عالم" مخدوعه
من يحطّك في بنوك الراجحي صرّافي = وانت ماتحسب حساب العمله المقطوعه
عقاب العنزي
دام لك منصب وعايش فالمحل الدافي = وش تبا في جيش ابن غانم وكسر دروعه
ودي اني اجتمع مع كافة الاطرافي = لين ننكشف وش خفايا الفتنه المصنوعه
« آخـــر الـــمـــشـــاركــــات »
07-Dec-2009, 02:08 PM
العرض الشجري