السلام عليكم ورحمة الله وبركاته
قصيده تقبلوها كما هي ...
ابن آدم لاعتلى صيته وطاول عالي الأمجاد=وثبت مركزه فأرقى المنصات الاماميه
وشهد له مستقيمين الدروب اللي على الأشهاد=وصارت سيرته عطره ووقفاته بطوليه
تفازع لأجل ترخي عزمه الأنذال والحساد=و فزوع أهل الحسد من فزعة الشيطان و الحيه
وش اللي حصّل الشيطان و الحيه من الإفساد=و وش اللي حصّله قابيل من روح الانانيه
مع انه من عطاء ربه عطى ما حسب الإنفاد=لكن الفرق كله فاختلاف الصدق والنيه
وعلى سوء النوايا صار مردود العمل وانقاد=لشيطانه وسن القتل لأصحاب العدائيه
وتولاه الندم مما فعل بس الندم ما فاد=بعد صار الغراب أفضل منه سر و علانيه
ووش اللي حصلوه إخوان يوسف يوم أبوهم جاد=على يوسف بحب ٍ جم وأعطوه الكراهيه
ولا له ذنب غير انه كريم وللفخر وراد=واله قدر ٍ كبير ٍ مالهم عند البشر زيه
غشتهم لعنة الفقر وعقوق الأب و الأنكاد=ووقت ٍ قسوته تعطي الكبود الكيه الكيه
ألا ياهل الحسد لو شفتوا أهل الكفر والإلحاد=عليهم شمسنا نار وعلينا شمسهم فيه
سنين ولا تضرر قدسنا بسياسة الموساد=ولا ضرّوا شيوخ الأمه أحبار اليهوديه
يعرفون الحقيقه بس من دافع حسد وعناد=ما يبغون العرب تظفر بالآيات السماويه
صلاة وتسليمه على المبعوث فاهل الضاد=محمد عربي والنصر و العزة إسلاميه
ألا ياهل الحسد عن حالكم لا يتعب النشاد=لو ارثي حالكم ما أوجزت في ستين مرثيه
هذا تاريخكم في محتواه اللون الأسود ساد= و صرتوا صفحة ٍ سوداء بتاريخ البشريه
ألا ياهل الحسد والريح تخشى هيبة الأطواد=ولا طال الجبل من عيشته دون البهيميه
أنا ابن ادم ولي من عزتي شيمه وستر وزاد=لكن انتم جنود إبليس مأموره ومنهيه
أنا ابن ادم ولو أخطيت الي مع توبتي ميعاد= لكن انتم بلاكم تلحقون السيه السيه
و أنا صبري ما هو لوجيه تباعة ثمود وعاد=لوجه اللي خلق لأهل الصبر جنه وحوريه
يكفيني فخر صرتوا جمر في واهج ٍ وقاد=و أنا فأول مشاوير المهمات الحياتيه
ويكفيكم دناءة سقمكم من حقدكم يزداد= وسعادتكم على الحيله وقطع الرزق مبنيه
ما تكظم غيظكم صوم رمضان وفرحة الأعياد=ولا تغسلكم أمطار الديار الاستوائيه
تحفرون الحفر خفيه ولا انتم للرجال أنداد=وبكم صدق الردى ما يستره زيف المثاليه
لا يكبر حلمكم موته قريّب والسيوف حداد=ولا تأخذكم روايات الأساطير الخياليه
تراكم ما تضرون الكريم معرّب الأجداد=وتراكم ما تردون الكرامات الالهيه
وتراها معركة تحصيل حاصل كل ما تنعاد=بكل النصر والتأييد للمحسود منهيّه
.. وسلامتكم ..
آخر تعديل زيد ابو كتيفه يوم 01-Feb-2011 في 08:51 PM.