غيض وغضب

[فرحان النومسى]

المشاركة الأصلية كتبت بواسطة ضاوي العصيمي

اخواني الكرام
السلام عليكم ورحمة الله وبركاته

يسعدني ان اقدم لكم هذه القصيدة واتمنى ان تنال شيءٍ من اعجابكم

يالقصيده بعد دورك وجب=اطلعي مثل مطلاع الهلال
ماكتبتك على شان الطرب=ولاهوا اللي تشادي للغزال
اكتب الشعر من غيض وغضب=العرب شفت فيهم مايقال
ضيعوا دلهم يال العجب=ومنهج اعمامهم وايا الخوال
والتراخي على الشيمه غلب=والحيا راح مافيها جدال
وقمت ادوّر لعلتهم سبب=واكتشفت انها داءٍ عضال
لادعاهم معزب للشبب=عنده ضيوف ومذكي خيال
كل واحد بملبوسه سكب=ومن عصر جا متاحي للعيال
روحوا قبل لاالشمس تغرب=مثل جيشٍ تحرك للقتال
قادهم للمعزب وانكثب=وكل ورعٍ على مركاه مال
والفناجيل خلوها حطب=والحقوا صفوة الكيف الحثال
والقدوع اعتدوبه وانهب=والعجم صال فى المجلس وجال
ولو يجي عقبهم جد العرب=مالقاله على المركى مجال
يجلس هناك ابو ظهرٍ حدب=يتحمل لو عضامه هزال
ولاروحوا ريح للزاد وزهب=نفذوا واستعدوا للنزال
وكل واحد تجهز واقترب=ماترده مرابيع الحبال
وفي ثواني على السفره وثب=واشترك باليمين وبالشمال
يجتلد كن في جسمه جرب=شيمته دون ويدينه طوال
ولا ارسل الضيف للداعي طلب=للمغاسل يشدون الرحال
ويفهق خلاف مفتول الشنب=لين يقضون من كل الغسال
وشايبٍ يشتكي ضعف الركب=يلزم سراه تقديره محال
ثم كل لمركاه انتدب=مثل ماينطلق سهم النبال
وانجضع فوق جنبه وانقلب=يتمغط مثل ذيخ الظلال
والمعزب تكدر واكترب=واندفن من حياه بن الحلال
والابو للفضيحه ماحسب=ولاعرف قدر لكرام السبال
وجهه ابرد من الماء فالقرب=جعل رايب عيونه للخلال
يلحقه لوم ويحمل عتب =ليه ما ارخى عليهم بالعقال
وليه ماعلم ابنه بالادب=وفهمه في قوانين الرجال
من يهمّل عياله ماكسب=منهم الا الفضيحه والخمال
يفهم الحر ويزيل الريب=والرخم فالرخامه لايزال
وهقوتي موعد الساعه قرب=يالله الطف بنا ياذا الجلال

صح لسانك اخى الكريم


وفعلا اصبحت هذه الامور ظاهره فى مجتمعتنا


اتمنى من المربين الانتباه لهذاالشى ولوان الخيرلايزال كثير ان شاء الله