من ديوان الشاعر / نــــــجــــــم الســــــمــــــريـــــــن

[نجم السمرين]

الحس النقي

(ياصاحب الحس النقي) الله ولا سَمَّ الملام=أقرب وخذ ماطاح به صدري وردَّه لِجْمِلَـه
ياضيق صدر البارحه أواه من صمت الكلام=وانا معك ماغيـر دثـر خافقـي وْ زمِّلـه
لحظه عساني مااعدمك لاهنت قبل إنك تنام=دام الغلا لك والبقا لـك والتوجـد والولـه
ماني ببياع الهوا لاهـل الهـوا لابالحـرام=قلب ٍ نزلت بداخلـه مـاوالله أحـد بْينزلـه
لكن بمان الله وخذها واضحه مسك وختـام=حرف ٍ نشا في داخلي مرالخفـوق وحَمَّلـه
سلام ياطهر الحروف البيض والنيه سـلام=والا الهروج الناقصه عن كل حرف مجمَّلـه
ماجيت ادور من ورا عذري ابي منك اهتمام=أخطيت ؟ لاوالله فلاني مخطي بْ ربع أنمله
حبيت ؟ ادري كنت اشوفك بس من بد الانام=كرهت ؟ لاوالله ولا ظني لك بْ يوم أحملـه
تدري وش اللي ردني عنك؟ لانك قبل عـام=تاخذ ولاتعطي عسى لاحـن قلبـك تسألـه
كم ليلة ٍ جيتك وانا مابين شوقي والهيـام؟=كم ليلة ٍ تعبيرك الصادق عجـزت اتأملـه؟
يمكن لأنك ماعرفت تحب واخلفـت النظـام=حتى اختلف بي كل حس وكل نبض مْهملـه
الله معـك لاتلتفـت والنيـه النيـه ظـلام=ماطحت قبلـك لا ولابعـدك ودربـك كملـه
(ياصاحب الحس النقي)الله ولادرب الغرام=طالت تناهيد الشعـور اللـي تعبـت آأمِّلـه