أوراق شــاعــــر

[هلال العتيبي]

صاحبي ياعل مايلقاه عوق
وان مشى دربٍ عسى الله يسمحه
ياعسى تنصاه الافراح ويروق
جوّه/ويارب حقّق مطمحه
كلّما خيّل على المنشا بروق
يحسب ان الارض خضرا مصبحة
ويحسب ان الشوق يتبدّل بشوق
والاماني في يديني ممرحة
اتصاغر كلمتي لن قلت ذوق
يا(نصيب) العمر مرة يمنحة
انت معدن مانْجلب في كل سوق
راس مال اللي هواك ومربحه
مير قمت تكرر (اعذار)وطروق
كن ودّك قلب خلّك تجرحه؟
لاتلوم النبض والقلب الشفوق
لهفة العاشق مرارٍ تفضحه
وان نويت الهجرة وعزمك صدوق
ودّعه قبل السفر واستسمحه
بلّغه لاينتظر شمس الشروق
واحرق اوراقه ودمّر مسرحه
ماحصل منّي خلاف ولازهوق
ولاخطاً واضح وعيني تلمحه
ولاخبرت انك على الجفوة سبوق
ادمح //الله كل ذنبٍ يدمحه
شوفني كبلت لك هذا الخفوق!
باعثه من دون ريشٍ واجنحة
في ظهر لوري مع الاغراض فوق!
للسموم وللهبايب تلفحه
وفّ مابينك وبينه من حقوق
وفي سراديب الجفا المر اطرحه
وان ثبت ظلمه وطيشه والعقوق
سامحه والا اسجنه والا اذبحه
وان ذبحته خلّك بذبحه رفوق!
واختر اسرع قاتل من الاسلحة
واسكب ادموع الحزن من كل موق
واحمله عاجل على اقرب مشرحة
شوف وش تلقى بدمّه والعروق؟
شي صعيبٍ ينفهم لو نشرحه؟!
م انت لاقي (غيرك) بكل مْعلوق!
انت قلبه وانت سعْده وفْرحه!