اللي كما ارقاب المها ارقابهنه

[يجيلك يوم]

مشكوور الدلبحي على مرورك العاطر لاعدمتك يالغالي وأبشر بقصيدة الضمني.

الله من قلب هجوسه عصنّه**كنه يسمر فـي ضلوعـه مساميـر
ياطارقا نجر الهوى لا تدنّه** جورك عليه يكسـر القلـب تكسيـر
واعزتي لسعود من كبر سنه ** عنه انتحى عصر الصبا والغنادير
في مامضى غيد الصبايا يبنه** واليوم ماله من وراهـن مشاويـر
حتى ابن هادي بالعيون حربنّـه** تغيـرت لفتاتهـن والمضاهيـر
ماكنهن عقب الغلا يعرفنه** راحن على ريـف النشامـا مناكيـر
والخس في قلبه من الحب لنه** مركز دفاعه بين هدمـن وتعميـر
والى نشدته قال قلبي خذنه**يامن ذكر لـي وردهـن والمصاديـر
وصحن الى شفته مع الناس كنه** بين الرجا و الياس يرسل مداوير
يطحن غرامه والهموم اطحننه**يشكي على دبيان بعـض التدابيـر
اقفى جديد العمر مافيه منه ** اقفاي عشب جاه صيف ومعاصيـر
كنّت مزونه والسمايم شونـه**و ابعـد ثـراه وييبسـن النواويـر
ليت الليالي ماخذن رجعنه**ينشاف زمـل مدوجـرات البواصيـر
يوم الحطب بحبالهن يجمعنه** بين الفياض وسانحـات الدواويـر
راع الهوى لو مايجيهن يجنه** والشك زايل والطـوارف مساييـر
والى لفاهم طارشا ينشدنه** عينت ماعينـت مـن غيـر تقصيـر
والى تلاقـن مـن ربيعـا مضنه**تقبلـن مقطانهـن بالتباشيـر
والعصر غالي لبسهن ينشرنه** بين البيـوت وبيـن ورادة البيـر
يازين صب الدلو بقدورهنه** قدام تـروي مرزمـات المعاشيـر
مافيه رادو بالغنـا يسمعنـه ** والا جهـاز يختلـف بالتصاويـر
بس المدوه يوم للبوش حنه **وقولت يـاراع السانيـه بالمحاديـر
راع المحبه يالنظر يشغلنه** تنشـق دلـوه بيـن روس المناعيـر
كم عاشقا بخدودهن صوبنه** ومعكرشا فـوق الردايـف دعاثيـر
على العبس ومن الشمطري غذنه**ماقصصوهن عاملين الكوافيـر
واليوم وقت يوذي الناس فنه **عشق الهواتف والصور والمزاميـر
وسعود صاح وتالي الصوت ونه** ومحمد اخفى صيحته بالمعاذير
ابو خلف عجف السنين امحننه** يومين والا يذكر البيض بالخيـر
طشوا كلايف جيشهم والاعنه**ماعاد قالـوا درجوهـن مغاويـر
يارب بدل نار الايام جنه** واغفر ذنوب اهل الوجيـه المسافيـر