هنا إنطلاق المحاورة المباشرة هذه الليلة بين الشاعرين حمدان العصيمي و شبيب الزراقي

[حاكم الغنامي]

العلم / حمدان العصيمي

سلامي سلامٍ يعزل الماء عن الطين=يصفىّ لمن عد الـروى ماصفالـه
ولاياشبيب أنته مع أي الفريقيـن=مع اللي جنوب الحي وألا شمالـه

المبدع /شبيب الزراقي

هلا من ضميرا يعرف الزين والشين=وطيـب المعانـي مايـدور بدالـه
انا موقفي معروف والكـل داريـن=ولا أضيع الرفقـه وحـق الزمالـه

العلم / حمدان العصيمي

وضوح الرسايل من وضوح العناوين=يابوصافي العنوان نـص الرسالـه
للا الدمع والابصار وش قيمة العين=لكن أنصتوا وألا أحكمـوا بالعدالـه

المبدع / شبيب الزراقي

انا شايفك بلشان مابين الاثنين=وكل الدعاوي تعتبرها سهالـه
زرعتو حديقه للغنم والبعارين=ومن شافها يختار يقعد لحالـه

العلم / حمدان العصيمي

وألا ياجماعتنا تراكـم عزيزيـن=شربتوا من الفنجال قبل البيالـه
زرعنا لك الرمان والخوخ والتين=وضيعت مفهوم الوفا والجمالـه

المبدع / شبيب الزراقي

تركم جماعتنا وبالحيل غالين=ومشروبنا بالطيب في كل قاله
كلاما تقوله مابداله براهيـن=ولاينفع الختال كثر الختالـه

العلم / حمدان العصيمي

أبو زيد يسعى لختلال الموازين=وهذا مصير الواقع اللي سعالـه
فزعتوا على دربه وجيتوا معيفين=عساكم تجيبون الرشا والمحالـه

المبدع / شبيب الزراقي

ياحمدان تمشي عكس ويسار ويمين=للاني منعتك صرت تحت الكفاله
انا طول عمري ماتبعت المقفين =لكن انت حطك واحدا من عياله