يا الله يا اللي مالنا دونك ملاذ ولا حجاب=يا باسط أرزاق البشر يا ساترٍ غراتها
سبحانك الله لا إله آلا أنت حلاّل الصعاب=علاّم ما تخف الصدور وعالمٍ نياتها
بسم الله الرحمن حثينا ونوخنا الركاب=اللي لها يومين تمشي ما طفت ويلاتها
مدورين العفو والسمحان وأعتاق الرقاب=ومقابل الذربين وآخيذ العلوم وهاتها
سلام يا الرجل الشجيع اللي فتح للصلح باب=اللي رفع قدر الرجال وحط من شرهاتها
الله يسكر عنه بيبان المصايب والعذاب=والله يسهل له دروب الخير وأرشادتها
الرآيه البيضاء ثيابه يوم تفصيل الثياب=يوم الثياب البيض شرهتها على راياتها
يا بن حمد تنشر لك البيضاء على روس الهضاب=أنت وبني عمك وربعك وقحطان بذاتها
عز الله أنك يا ولد قحطان داويت المصاب=اللي عيونه ما يجف الدمع من عبراتها
يا كبر معروفك على العتبان حضّار وغياب=في ذمة أخوانك عتيبه حيّها وأمواتها
سلام يا شيخ الحباب ويا رياجيل الحباب=الله يسلمكم من الدنيا ومن صكاتها
يا طيبين الآصل والمنشى وسمحين الجناب=سمحين الآرياء مخلفين القوم عن هقواتها
سلام يا جمع قّحطان الشيب منكم والشباب=تحية الآسلام هذا وقتها وأوقاتها
سلام يا قحطان يا مروين سلات الحراب=أليا تلاقن الوجيه وردّوا لسلاتها
سلام يا شولان الآيدي يا معشين الذياب=شهب الذياب اللي مع الغبشه تجر أصواتها
الله يسلمكم ويجعل رايكم رآيٍ صواب=على الطريق الصح في هذي وفي غيراتها
جوكم عتابه من فيافي نجد لا ساق الغراب=امدورين العفو والسمحان والدنيا هذي حالاتها
جوكم يسوقون البشر سوق الهبايب للسحاب=هذي وجيه القوم مجلوبه وذي حضراتها
على وجيه القوم من طول السفر مثل الضباب=ومن الحياء محدٍ يميز هرجها وأسكاتها
يا الله عسى فالآمر خير وفايده وآجر وثواب=يا الله لا تحرمنا من الدنيا ومن لذاتها
ما قل دل وخير ما فالهرج ما قلل وطاب=أخير من تطويلها تقصيرها واثباتها
فيه واحد من قبيلة عتيبه قثامي قتل خويه القحطاني اعتقد عن طريق الخطأ...
وفي شهر ذو القعده 1430ه ألفوا قبيلة عتيبه على الحباب من قحطان وطلبوا بعض من أفراد قبيلة عتيبه قصيده من الشاعر مصلح بن عياد وقد أعدها الشاعر مصلح بن عياد لكن عندما أرد الذهاب معهم تلقى خبر وفاة أبن عمه ولم يحضر من العتبان عندما ألفوا على قحطان...
وقد أرسل القصيده معهم...
وقد تم الصلح بينهم وعفوا عن القاتل القثامي ولا أعلم هل تم الصلح مقابل مبلغ مادي أم لا...