(انا ندِّك إذا ابوي شايم)
للشاعر اسامه نجم السمرين
حي البيوت اللي من الروح تقتات=اللي اليا طاحت خذت كل سايم
صحيح عمري سبع لكن ليا جات=لي حزة الهده تجهمت حايم
اشهر ولي يمنى ويسرى جريات=من دون ابوي ودون ربعي كعايم
شاعر ولي فزعه وجزعه ومدَّات=يفخر بها ناسٍ بعيني غنايم
اهل القلوب الصافيات النظيفات=الطاهرات الوافيات العظايم
اللي لهم في هامة الطيب هامات=فوق الجدي ماوكروا بالقصايم
والا انت ياخاين رفيقك سلامات=جيتك وانا ندِّك إذا ابوي شايم
مترفعٍ عنك وانا الدين مامات=ملزوم اسده في بنوك الظلايم
ساعة رماك ابليس وابديت مافات=نوبٍ تحد الصوت واحيان لايم
جيتك وعندي لك عن ابياتك ابيات=مصقورة ٍ ماقرنسوها الهلايم
تَضْرم على كبدك وكم قبلك اصوات=تبي المجره وامرحت بالخرايم
لو ينطبخ راسك حماقات هيهات=ماطاح من راسك نرده ضرايم
تزرع من الفتنه ولك عشر نيَّات=ابيضهن اللي مثل سود العمايم
حاولت أدوِّر لك عذر انت بالذات=ولا لقيت الا الردى فيك زايم
الاوله كنك بروس الطويلات=تصرف ولكن مالصرفك دعايم
غير الهزال الناشفات الرديات=اللي عليهن من رداهن علايم
والثانيه كسب وغنايم وغارات=وفعل ومواقف بالسنين القدايم
وامجادنا وامجاد ربعك قبل تات=فوق الثريا والجدي والنعايم
عدوهم يحسب من حساب الاموات=وقصيرهم من دونه الضيم نايم
والثالثه عذرك حقوق وجمالات=وانا ادري انك والجمايل خصايم
ارخصت قدرك والرجل حي موَّات=لابان حقده راح قدره حطايم
هات الذي في جعبتك طالبك هات=واشره علي اللي مايسد القسايم