الشرد اللي من التفاق مذعورة ( قصيدة مسندة للشاعر تركي نايف القبع )

[بندر سعود الدغيلبي]

السلام عليكم ورحمة الله وبركاته

هذه القصيدة مسندة للأخ العزيز الشاعر/

تركي بن نايف القبع

الشرد اللي من التفاق مذعورة = دايم تجي لي على المرمى واصوبها
في روضةً من حقوق الوسم ممطورة = مافيه حياً من الشعار داج أبها
أستاذ واشرح دروسي دون طبشورة = واحول الدلو وسط البير وأجذبها
واترك دروباً من الجهال معبورة = لاخير في لحيةً هانت شواربها
وآخذ من النص مايرقى بجمهوره = في مستوىً من سمو الفكر لاقبها
ياراكب اللي يشابه حس ماطوره = بنتاً تكلم على الجوال صاحبها
جيباً علامة تويوتا فوق ديكوره = مركب شيوخاً تذري من يلوذبها
ملفاك في نجد شبلاً يوفي شبوره = تركي طلاقة حجاجه مايشحبها
صعب القوافي حكمها تحت باكوره = قدام عينه تزاحم لين يكتبها
لازار بستان يقطف غالي زهوره = وان حول الدلو يملاها ويسحبها
ذخراً لعوداً مضى فالشعر له دوره = من بيت شعار ماتشعب ركايبها
لاحط فوق الفياض الصبح من نوره = غاب القمر تاركاً للشمس واجبها
أقلط لقصراً ملاه القرم بحضوره = قصراً لقوماً حشيماً من يقاربها
آلاد منعر حزامي ساعة الثورة = العزوه اللي عطيباتاً مضاربها
تلقى رجالاً تهلي بك ومسروره = أشبال نايف عسى الله مايغيبها
في ضفهم تامن العذرا من البوره = هم سترها عن جميع اللي يعيبها
تستاهل البيض فوق طويق منشوره = ياتركي أصبحت قولة نعم كاسبها
في مثلك المدح يدعيني وانا أزوره = وآخذ خيار المدايح فيك واعذبها
أحداً يسوق القوافي حسب منظوره = ماينبسط لين ياطا فوق غاربها
واحداً عصاته مع الشعار مشقوره = تصعب عليه القوافي مايركبها
واقبل بيوتاً على شرواك ماموره = منظومةً نظم سبحة وأنت قاضبها