خطاك وخطايا

[ماجد المحياني]

السلام عليكم ورحمة الله وبركاته


أبيات متواضعة للتواصل في منتدانا الغالي

أخطيت في حقي وأنا بحقك أخطيت = وصرنا نجازي بعضنا بالخطايا
أجمع خطاك اليا جرحت وتماديت = وأحسب جفاك اليا تكرر معايا
وأنته على دربي عديت وتعنيت = تتعب على طرد الخطا من ورايا
ماكنك اللي بأول العام حبيت = وماكنك اللي مبتلى في هوايا
ياصاحبي في وصلنا ويش سويت = وش مكسبك يومك تفارق دفايا
العام أشوفك في عروقي تلويت = وترضي صباحي والهنا في مسايا
واليوم لا والله بالعون صديت = وخليتني مع ضيعتي في عمايا
مدري المشاعر بيننا مالها بيت = ولا الدلع سبة بلاك وبلايا
متى تعود وتوقد بليلي الميت = نار المشاعر ياغلاي ومنايا
وتعود للأشواق مادامك أبطيت = ويحوم طيرك يالغلا في سمايا
شفني أهوجس وأكتب البيت والبيت = لعلها تروي الكبود الظمايا
واليوم عوًد لي على ماتمنيت = وأنسى الزعل وأنسى خطاك وخطايا