سلطان الجـذع
ياسلام الله سلامٍ يطلب الجاهل فراقه = والعقول الراجحة عز الطلب هذا طلبها!!
يارعد قدام أوقع معك ميثاق الصداقة = محتسيك بطرقةٍ تأخذ لك ايام بتعبها!!
العمــــــدة
يا هلا يا مرحبا رحب الفخامـــــة والاناقه=تنصرف للحية اللي دونها يثني شنبها
الحمل يا صاحبي تعرف جماله من نياقه=مار كل الحسبة اللي محتسيها معك جبها
سلطان الجـذع
مااختلفنا في وصوف الصورة اللي فالبطاقة = اختلفنا فالعلوم اللي على البال وسببها!!
قبل ليلة ماوصلك من العشاء غير الذواقة = وليلتك هذي تصب إلك القريحة من غضبها!!
العمــــــدة
القمر كنت اعشقه حتى سمعت عن انشقاقه=كم قلوب تسامره وبحسنه الطاغي جلبها
موجز النشرة وتفصيــــــــــله وجله مع دقاقه=في سفينه قوم منا شالها الموج وقلبها
سلطان الجـذع
لليقين تفك باب وللشكوك تفك طاقه = لا سقا الله الديار اللي تجافت مع عربها!!
أحسب إنك ما تبل الراس لامواس الحلاقة =لين جتك اللي من الحناء محنيةٍ ركبها!!
العمــــــدة
العواني قيدوا والقيـــــد من يطلق وثاقه=قبل قوم الطيب والمعروف ما يكبر عتبها
ويش تهمتكم عليهـــم يا عتابه يا رفاقه=يا ذرا اللي عينها من فوقها عسكر هدبها
سلطان الجـذع
تعرف إبليس المهول يوم غوتّه الحماقة = أحرمه ربي من الجنة... ويبطي ماقربها!!
مانباها في عمود البيت والا في رواقه =لا تصير اللي بعد ما سارت الساقة عقبها!!
العمــــــدة
عيش زايد ملح .. تعني شد اواصر للعلاقه=ما تقوم اهل الرتب من غيضها تمسح رتبها
دام حدك يا وطن ســـــالم ولا تم اختراقه=القضية من كتبها والبرايا من نكبها
سلطان الجـذع
تبطل العشرة مع اللي يعشق العوجاء عشاقة = ودحرته فرض لنا ماهو ذنوب نرتكبها!!
المعوق ماله الا يارعد دار الاعاقه = عن حلال اهل البشوت اللي عريضات قصبها!!
العمــــــدة
الرجل ما يستهان ويبتـــــر ذراعه وساقه=غير عند الحد والا في غصيبه مغتصبها
الجزاء معلوم والا الجرم ما شوهد سياقه=والوكاد اني كفيل للحيةً ما قل ادبها