حاكم الغنامي
يامرحبا ترحيبةٍ تنصاك يالوجه الجديد =يالشاعر اللي ديرته توه يدل دروبها
ابدع يابن حامد من جزال المعاني والقصيد =وليا ذبحك الجوع خم البكره بعرقوبها
سلطان ابن حامد
يا مرحبا مالي بها حاجه / عسى عمرك مديد = دوّر لها غيري وقلها / وإفتهم ماجوبها
إن كان ودّك تآخذ البيرق / وسيف ابن الوليد = لا تحتري ربعك / وتنظر وش تشيل جيوبها
حاكم الغنامي
ان كان ماتبغى الكرامه يالعصيمي وش تريد =وش محرمك من خنة الدله ومن مشروبها
مغنييني الله بالعتاد وسلة السيف الحديد =عن مكسبٍ بين الجمال اللي تحك جنوبها
سلطان ابن حامد
يالروقي اللي تسرق الروقه / وتجحدها جحيد=أثرك على شان الكرامه / تنطوي في ثوبها
بكره يجيك العلم / من شيخ المحايا وإبن زيد=ثم عاد دوّر راعي العمهوج / يقضي نوبها
حاكم الغنامي
اعرف جمال هذيل عن درب المصاعب ماتحيد =السم وسط كبودها والبغض وسط قلوبها
مفتاح مكه من يد العباس بيدين الرشيد =عاشوبها وقت الرخى وعيالهم ماتوبها
سلطان ابن حامد
إترك جمال هذيل / وإرق الضلع جعلك ما تفيد=وأنا ما أحبّ أفضح / عبادٍ بان لي عذروبها
[مدري بطل / مدري خبل / مدري ذكي / مدري بليد]=بس الأكيد إنّك / تحاولها ولا أنت بصوبها
حاكم الغنامي
الله يغش اللي ظلمك وقرّبك وانته بعيد =في سد وجهي كان نفسك فازت بمطلوبها
ماثمنك من يجهلك... مير الزم العلم الاكيد =يمناك لا تو ميبها بين الرحى وحبوبها