شلي بنا مع رقاق المخرم الخالي - الهيـــــــــــــلا *** منتدى قبيلة عتيبة

حمود بن خيشوم العصيمي · 07-Sep-2011, 02:06 PM

حمود بن زيد الشريف من كبار الاشراف ذوي زيد بالطائف رجل له صيت وشاعر كبير وذات مره فقد مجموعه من الهجن منها هجن عمانيه مشتراه حديثا وبحثوا عنها قريبا من الطائف ولكن المداوير ما وجدوا لها أثر فارسل حمود بن زيد يستنخي اثنين من معارفه شيوخ قبائل بالطائف لدورة الهجن ولكن من أرسل اليهم عاد اليه مرسوله من عندكم بعدم الموافقه
فارسل على جدي الشيخ سعد بن ناصر بن خيشوم شيخ النباعين يبلغه بما حصل وبرد من نخاهم وقال للمرسول قل لسعد هجن عوانيك تهمك ولاذكرنا الا الله ثم أنت يابو حسين تعرفون الديار وأفزع لعوانيك فقال للمرسول سلم عليه وقله يقولك أبشر بالسعد تجي الهجن ان شاء الله
وهم بالممشى بنفسه للبحث الا إن عمي المرحوم حسين بن خيشوم طلب منه ان يكفيه فيها فوافق وبدأ في رحلة البحث وأثناء سيره في الصحراء قال هذه الابيات لتنشيط أخوياه ورفع معنوياتهم :

شلي بنا مع رقاق المخرم الخالي =مادام كورك موثقة مصاليبه
جاءنا الخبر من شريفٍ عندنا غالي=واليوم نمشي ترانا في مواجيبه
حمود بن زيد نور يشعل اشعالي=وحنا عوانيه ونلبي مطاليبه
عن لازمه ماذخرنا الحال والمالي=والله لن الله قسم يالجيش لنجيبه

ووجد(الهجن) الجيش كما كان يطلق عليها واستطاع أقناع من وجدها معهم لاخذها بدون مقابل ورفض دفع المبلغ الذي يعطى لمن يحفظ الحلال الغادي مدعيا انه صاحب مدرك راعي ساموده وان ما يوجد عندهم يؤدى بدون طراحه لعتابه فقبلوا بعد تدخل احد الاشراف من الحارث وأييده فيما إدعى به وقال أعطوه جيش عوانيه بعد أن أعجب بقوة حجته

وعندما وصل للشريف حمود بن زيد فرح الشريف وقال وشيءقلت يابن خيشوم في ممشاكم علمني ختام المقاطي بطرف العلم واكماله من عندك قال قلت أبيات في الخلا مادريت انا بتأصلك قال هاتها صح لسانك فالقى الابيات السابقه يقول فقام حمود بن زيد وماهي الا لحظات وهو داخل وقال اسمع ياحسين :

يالله يامسندي ياواسع الجالي=ياخالق العبد وميسر مطاليبه
ياعالمٍ ماخفنك كل الاحوالي= يامطلع في خطاي العبد ومصيبه
جاءني كلام كما ذوب العسل حالي= من شاعر من هناديبه يغنيبه
ساعة سمعته وأنا يستر به بالي=من قال قولٍ على الافعال ياطيبه
ياحسين هاذي علوم معرب الخالي=يوم إن بعض العرب كلت مخاليبه
تغشاكم البيض في الاقفى والاقبالي=ما أخترتكم غير هذا الفعل محريبه
يعطي محب الجميله كل مانالي=لو أوزم الحال حتى العمر يصخيبه
وتصعب دروب الجميله عند الانذالي=لو كان ينوي الجميل الطبع يلويبه
ما يدري ان الجميل ابقى من المالي=الله يحبه ومن يفهم يوصيبه
وأختم كلامي بذكر عد الاثعالي=على محمد وآله ثم أصاحيبه

قال المرحوم صح لسانك وما سوانا الا الواجب يالعواني
قال الشريف حمود بيض الله وجيهكم ولابيض الله وجه 0000
قال له ياشريف فلان خال عيالكم وأما فلان طوال الخيل تحمى قصارها
فرد الشريف كلً سبعٍ مقصوصٍ بجرته
قال المرحوم درب السبع واحد
فاعجب الشريف بسرعة بديهته وحسن ردًه ومنطوقه
وقاله صدقت ياحسين درب السبع واحد

وبعد وفاة الشريف حمود بن زيد بسنين حصلت مشكله مضاربه بين عيال الاشراف
والعصمه ذوي معيوف بالقيم ولما حدد موعد ملفى السده للاشراف جاءوا العصمه للمرحوم
وقالوا حنا لافين الاشراف ولانستغني عن حضورك معنا فقالهم ابشوا ولما حضر وحضر كبار الاشراف ذوي زيد كان هناك تذمر من الاشراف ويبسوا دون العطاء والتنازل عن بعض الحق وبعد جدال قوي وعدم تنازلهم عن عشرة آلاف قيمة دم قال للاشراف انا استفزعني حمود بن زيد وعلًم بالسالفه والقصيدتين والحوار الذي دار بينه وبين حمود الشريف فقام شرف بن فهيد بن زيد وقال على هونك يابن خيشوم انتظروني دقائق ودخل منزله وجاب العشرة الاف وقال يا اشراف ابن خيشوم ركز له طيبه ولاحنا ما خذين من العصمه شيء اما اسمحوا فيها والا أخذوها مني ولاهي تبقاه عليكم حشا لكن سالفة ابن خيشوم قومتني والله ما يسلمونها العصمه ورمى العشره الالاف على الفراش وقال حق الاشراف جاهم مني ياعصمه ومسموحين وواسونا قال انا أنا أواسيك على قصها ونصها لنرضى مثل مارضيتوا وأنا ابو نائف قال شرف وأنتم في وجيهنا من العقب والتقب 0
قال بيض الله وجهك ياشرف ووجيه عوانينا كلهم وأعادوا لشرف المبلغ وشفعت الجميله السابقه فيما بعدها وهذا من عادات الرجال وسلامتكم

آخر تعديل حمود بن خيشوم العصيمي يوم 07-Sep-2011 في 02:09 PM.

عايش دحيم العتيبي · 07-Sep-2011, 03:43 PM

والله كفو يبن خيشوم
ونعم بك وبجدك وسلمت
يمينك على القصه

عـقـــــــــــاب · 07-Sep-2011, 11:41 PM

والله ونعم وكفو يابن خيشوم ولا يستغرب طال عمرك

اقتباس:

قال له ياشريف فلان خال عيالكم وأما فلان طوال الخيل تحمى قصارها
فرد الشريف كلً سبعٍ مقصوصٍ بجرته
قال المرحوم درب السبع واحد
فاعجب الشريف بسرعة بديهته وحسن ردًه ومنطوقه
وقاله صدقت ياحسين درب السبع واحد

الله يرحمه هذا والله الرد ...

الله يرحمهم جميعا

وبيض الله وجهكـ على الروايه