قصه من الراوي محمد الشرهان

[ولد الضيغمي]

[size=4]السلام عليكم ورحمة الله وبركاته


قصة حزينة واقعية من الراوي محمد الشرهان

اماانة تقراهاا وتعطيني رايك بالرد

تنادي ببابا مادرت ذخرها مدفون.. قصة السياري (( توفي 1416 هـ ))

-


هذي قصيده مرثيه حزينه جدا ومعها سالفه
سمعتها في برنامج الراوي محمد الشرهان
وبحثت عنها بالنت ولقيتها لكم..

(الراوي محمد بن علي الشرهان من كتابه سالفه وقصيد)

هذه سالفه وقصيده من الشعر الشعبي كما تعلمون مو فيه باب

الغزل وفيه باب المدح وفيه باب الرثاء

والرثاء باب من ابواب الشعر فالقصيده اليوم من قصائد الرثاء .

هذا الشاعر المعاصر هو عبدالله بن محمد السياري

الرجل هذا له اولاد ولده الكبير اسمه (خالد)

وله اولاد ماشاء الله فيهم الخير والبركه والشاعر عبدالله

له اخوان ناصر وابراهيم وفهد وعبدالعزيز ناصر اكبر منه

والباقين اصغير منه الحاصل ان عبدالله السياري

هذا له ولد ولده هذا الكبير خالد درس وتعلم وتخرج من الجامعه

كان الولد وجه رجال يملي عينك في الكلام

وفي الحديث والفهم يملا عين اللي يقابله وكان يعني من غير قصور

بالجميع كان هو واجهتهم هو الواجهه لهالبيت هذا وهالعائله

لكنه كان محبوب ودمث الاخلاق وحبيب وطيب وشاعر

ويميز الكلام ويقرأ الرجاجيل ويعرفهم يعرف الاشخاص اللي يقابلهم

كلن يعطيه حقه على حسب مقامه تعلم ودرس وتخرج من الجامعه

وتعين واستمر وعقب فترة تزوج ولما تزوج ومضى على زواجه

يمكن حدود الاربعه اشهراخذ له بيت بجنب بيت اهله

وقام ياثث البيت هذا ويجهزه على اساس يبي ينتقل فيه بزوجته

كان الله يرحمه الولد هذا الظاهر مركب له صمام بالقلب

يوم انه صغير ويجوز انه مالاحظ او مااعار الاهتمام لحكاية الصمام

هذا ومتابعته فيجوز انه ماتابعه لكن (الاعمار بيد الله سبحانه وتعالى)

الحاصل انه يعني صاير وش اقول عنه ولد حبيب تتعب وانت تقول

عنه رجل ودمث الاخلاق وطيب وسمح البال ودائما كل الناس تحبه

وكل الناس تقدره وكلمته دائما لها صدى ولها حس يجتمعون عندهم

الناس وابوه مدهل للطيبين دائما يجتمعون عنده الشعراء والادباء

وعقب مامضى على زواجه فتره وتم يمكن اربعة اشهر خمسة اشهر

ياثث البيت هذا يبي ينزله تعب في حالة النقل والشيل والحط

وهذا ويقول
-يهرج علينا ابوه- يقول يوم جاء يوم من الايام (انا والله شايفه الله

يرحمه قبل وفاته يمكن بيوم او بيومين بيوم شايفه مقابلني ومسلم

عليه عقب المغرب مسولف معه علي ومعلمني عن تاثيثه للبيت

وان مابقى له الا شي بسيط مقابلني انا شخصيا ومهرجه لان هو

من اعز اصدقائي اللي اعتز بهم)

فيوم من الايام وانا في العمل عقب هالكلام بيومين مادريت الا يتصل

علي واحد بالتلفون يكلمني يقول لي(يقول خالد يطلبك الحل) كيف؟!

قال : نعم

متى ؟!

قال:البارح

جيت عاد اسئل ابوه في العزاء قلت: وشلون؟

قال : والله ابد حنا مجتمعين ومسولفين ومتعشين ذيك الليله

ماعندنا خلاف سرى من عندنا الساعه 12 رايح لغرفته فوق

وقعد هو وزوجته الله يكفينا وياكم شر صيحة الغفله

الا ويوم نادى زوجته

قال : يامره

قالت : نعم

قال : نادي ابوي وامي ناديهم

قالت : وش تبي بهم ؟

قال : ناديهم ابهرجهم بسرعه ناديهم

كنه يبدو عليه التعب ويبدو عليه الارهاق يبدوا عليه.

راحت ونادتهم وجابتهم جو وقعدوا عنده ابوه وعمه

ووالدته بعد والدته ماشاء الله عليها يعني جيده وتتحمل

فتقابلوا عنده وش فيك وانا ابوك سلامات بسم الله عليك

عسى ماشر قال والله اابوي كني احس روحي اني انا ماني نشيط

لكن ابوصيك وصاة ياابوي اول شي بطلب منكم طلب

انت وعمي ووالدتي مادامكم حاضرين عندي انكم تحللوني

وتدعون لي بالخير انا والله ماادري عن روحي لكن باوصيكم

وصاة لاتنسونها المره هذي (اللي هي زوجته طبعا) تعرفون

انها على وشك ضنا لكن ان جاني ولد سموه على جدي محمد

وان جاني بنت سموها على والدتي

وانا ابيكم تحللوني ان كان بادر مني شي وتبيحوني

احس ان روحي اني ماانا بالحيل

وذا كيف ويوم روعهم بالكلام ذا والمهم اسرع من قولة ياراشد

يوم بردت رجليه ويديه ويوم طاح عليهم يتلوون يبونه

يوم طاح بينهم يفوق شوي يوم طلعت روحه وتوفي

يبون يركضون للمستشفى قالوا والله مات يقعدون يلتوون عليه

ويصيحون عليه كل الليل الله يدفع البلاء المهم راحو به دفن الولد

وراح توفي الله يغفر له ويرحمه

لكن قعدت الجرايد يجي شهر او ازود وهي تنشر مرثيات عنه

وعن دماثة اخلاقه وعن طيبته وعن حبابته يجي شهر

وحتى اللي مايعرفه وشاف اللي غيره يقصد فيه

لانه يقول الاول يقول شاعر قب ل يقول :

مـــاخـــــلا الاول للــــتالي شيء يحتاجه ماذكره

يوم قال : من اطيب عيالك قال اللي يجـــيك خبره

خبره بالطيب وبالمحبه وبالدين والصلاح

وبكل شي (الله يغفر له ويرحمه)

قعدت تنشرها الجرايد القصيد اللي قيل فيه , هاه راحوا تفرقوا الناس

والمره راحت عند اهلها وبعد فتره اضنت وجابت هاك البنيه

اللي مره مصلصله اشباهها عليه (سبحان الله العظيم) جابت هاك

البنيه قعدت عندهم فزت البنيه صار عمرها سنه ثلاث سنين قاموا

يزورونها اهلها (اللي هم جدانها)

الاجاء يوم الجمعه او يوم الخميس جابوها عندهم ومن محبتهم لها

عندهم عيال واجد غيرها لكن محبتهم لابوها قبل يغلون البنيه

هذي يلبسونها زين ويدارون خاطرها

يكدون شعرها يكحلون عيونها يحطون عليها خماخم يزينونها

يلاحظونها يلبسونها الذهب الزين مدلّلة كل يقول تعالي ياامي عندي

تعالي يابنتي تعالي عندي والا البنيه ذكيه ومنتبهه

بس ماتدري من هو ابوها من هذولي كل من قال تعالي يابنتي

عندي تحسبه ابوها فبعد ماضي فتره هالمده هذي ثلاث سنين

او اربع سنين الجرح اللي في كبد عبدالله السياري بعد وفاة ولده

مثل الجرح القاطب اللي ماتبين ماتبينه العبره ولاتبين الشيء

الا عقب هالفتره وخاصه الا جت هالبنت عندهم

وشافها لاشاف هالبنت هذي تأثر ماعاد يقدر يصبر راح وصد ركب

سيارة عنده ونيت مصفح راح ودور جبل والا شي معتلي

وراح فيه الين تهلهل عيونه من البكاء ويطلع اللي في خاطره

ويعود ولهذا عبر عن هالحاله بالابيات هذي

ويقول الحقيقه انها حزينه انا ماودي اسمعكم الشيء الحزين

لكن هذه من جودتها ومن قوتها ونبيكم تدعون له ولموتى

المسلين بالجنه ان شاء الله الله يغفر للجميع ويقول :





متى مالعباير ضيقت صدري المشحون
ونوت عيني الحرّى تنثر عبايره

ركبت المصفّح مبعد الهقوه المامون
وتنزحت بعيون على الصبر عاسرها

تنحرتّ لي رجم على الوادي المصيون
تعلّيت به والعين جابت ذخايرها

على فقد (خالد) ونتي ونة المطعون
تكض العيون الدمع والحزن حاشرها

انا اظني احيا مابقالي وانا محزون
من الصدمه اللي رب الارباب خابرها

الا شفت ساره تدرج بينهم بالهون
تعثر وتنهض واقشر الحظ عاثرها

تنادي ببابا مادرت ذخرها بالثرى مدفون
تعلق بمن شافت وتنخى عشايرها

تنحيت عنهم واسلبت عيني المخزون
اطمّن وألدّ بناظري لايناظرها

وإلا خف حزني صحت ياربعنا تكفون
على الكبد حطوّها تطفي سعايرها

هلا مرحبا ياكل عمري ونون النون
ضنا من خياله شايفه في نواظرها

انا اشم ريحة فيك لوقيل لي مجنون
عيون الخلي لو نامت الليل عاذرها

ارجو ان يكون في هذه القصه والقصيده العبره عن الدنيا الفانيه وتفيد في قظه القلوب

انشالله ما اكون ضيقت صدوركم وقطعت قلوبكم ..









منقول

[عبدالله الجـــذع]

قصه وقصيده حزينه جدا

الله يرحمنا برحمته

الف شكر ولاهنت

محبك

التوقيع

قال الرسول صلى الله عليه وسلم [مَنْ قَالَ أَسْتَغْفِرُ اللَّهَ الْعَظِيمَ الَّذِي لَا إِلَهَ إِلَّا هُوَ الْحَيَّ الْقَيُّومَ وَأَتُوبُ إِلَيْهِ غُفِرَ لَهُ وَإِنْ كَانَ فَرَّ مِنْ الزَّحْفِ ]( سنن الترمذي ) . . قال صلى الله عليه وسلم : ( إن الشيطان قال : وعزتك يارب ! لا أبرح اغوي عبادك ما دامت أرواحهم في أجسادهم ! فقال الرب تبارك وتعالى : ( وعزتي وجلالي , لا أزال اغفر لهم ما استغفروني ) ... ( السلسله الصحيحه ) . موقع يضم جميع القراء هنا

[ولد الضيغمي]

اللهم امين

الجميل مرورك اخوي

[مشاري الحبردي]

كفانا الله شر الاحزان ,,,


سلمت يمناك يالضيغمي

[عقلية صريحة]

الله يرحمه ويحفظ البنت

وتسلم على الطرح المعبر والمؤثر

[أبونايف الروقي]

	نسأل الله أن يرحمه ويغفر له ولأموات المسلمين . والقصة والقصيدة مؤثرة لاشك وهذه حال الدنيا نسأل الله أن لايري الجميع أي مكروه . وسلمت على هذا الطرح . تقبل مروري .

[ابو ضيف الله]

على فقد (خالد) ونتي ونة المطعون
تكض العيون الدمع والحزن حاشرها


قصة وقصيدة مؤثرة جداً
الله يرحم خالد ويبيض وجهك يا الضيغمي

التوقيع

قال الشافعي رحمه الله: أركان الرجولة أربع: الديانة والأمانة والصيانة والرزانة. قال الخليل ابن أحمد: التواني إضاعة, والحزم بضاعة, والإنصاف راحة, واللجاجة وقاحة. اللهم أنصر من نصر الدين وأخذل من خذل الدين

[العرمـــ(صومالي)ــلي]

و

إلا خف حزني صحت ياربعنا تكفون
على الكبد حطوّها تطفي سعايرها

ياااااه والله انها قصيده تشيل القلب من مكانه وتستاهل الحفظ والله الله يرحمه ويرحم مووتى المسلمين
وماقصرت غلى القصه صح انك فقعت قلووبنا بس قصه حلـــــــــــــــــوه ..

تحياتي لك