الوليف اللي معذبني صدوده

[متعب ثواب الجعيد]

بسم الله الرحمن الرحيم
هذه الابيات تعبّر عن ظاهره دخيله غير مريحه تفشت في مجتمعنا سواء داخل البيوت
او اجتماعاتنا في كل المناسبات وهي كثرة استخدام اجهزة الاتصالات حتى في المجالس
اصبحت مزعجه و اصحبت المجالس عديمة الفائده لانشغال كل واحد بجهازه
اتمنى ان ترتقي لذائقتكم الشعريه وتحوز على رضاكم

البلاء فالناس زايد عن حدوده = من حضاره جاتنا والله شمازه
من برامج للتواصل . لا يعوده = شتتوا شمل التقارب وامتيازه
فالمجالس عودوا مثل القروده = كل واحد جالسٍ يفلي جهازه
والعيون مبحلقه باذل جهوده = بالاصابع يشتغل طق وهمازه
كل واحد يختلف طبعه ومووده = ما نفرّق بين طيبه والخنازه
معرفتهم عودت رطنة يهوده = (انتر) و( ديليت) وال(نك نيم ) فَازه
(آدد) والا ( أقنور) بالاصحاب فوّده = و من يعكّر خاطره ب(بلوك) حازه
(قانق ستايل ) رقصهم تَطرب وفوده = عذّروا باتراثنا صاير جنازه
الولد ما جاز اله ماضي جدوده = والصبايا ما لهن بالأمس عازه
ليه ماضينا تبدل يا شهوده = كيف مجلسنا تغير في طرازه
السوالف والقصايد في بروده = والعلوم الطيبه صارت طَنازه
ما استفدنا منه لوكثرة عدوده = غير تدمير البناء خرّب عَزازه
والهوى العذري تغير طِيب نوده = صار شكوى العاشقين بها ابتزازه
فالـ(تويتر ) يشتكي لا وا وجوده = قال واينه غايتي زاد اعتزازه
الوليف اللي معذبني صدوده = كان بالواتس اب ياخذها اتنهازه
لوعلى ماسنجري يرسل ردوده = والسكايب صورته مثل القزازه
وان بغى( فيبر) و(تانقو) عن ودوده = يكبس زرار الحظر فك احتجازه
ما نقول الا عسى ربي بجوده = يصلح اجيالٍ تباهوا بالشمازه