[عـاشـق الحقـيـقـة]

بسم الله الرحمن الرحيم

***


مزنة بقت قصّة .. !

ما احْلَى المطر من مزنة(ن) برقها حَيّ = يخطف نواظرنا كما الشمس ظِهْرَا
منها سواد الليل بالبرق مِضْحِيّ = يصبح نهار(ن) بعد ما كان غَدْرا
وامّا رعدها مِثْل رمي(ن) على نَيّ = صبّ الحيا يكْسِر لجيجه ويَدْرَى
وحِسّ المطر لا اقْبل كما شَوْيَة النّيّ = من قوّ صبّه يجعل الحزْم مَجْرَى
وثعل البرد فيها نقيّ(ن) من المَيّ = كبْر المصاقل حبّته ما تضِرّا
و( رضوان ) مَنْبتها سداها على ( اطحَيّ ) = منها الرقاق البيض في العين حمرا
تاخذ سبع ساعات من فوقها اشوَيّ = حتّى تصير النفد بالسيل خبْرا
ومن عقبها نبت النصي صاير(ن) فّيّ = وحتى الحزوم السود بالعشب خضرا
وتبقى خباريها على حَولها امْلِيّ = وقلبانها في ناظر العين غبْرا
ومَهْما وصفنا ما لَحْقنا لَها شَيّ = مزنه بقِتْ في الناس قصّه وذِكْرى
*** = ***

ـــــــــــــــــــــــــــــــــــــ

(1) - رضوان ، وطحي : موضعان معروفان على الخطّ السريع ( الرياض ، الطائف ) .


* عاشق الحقيقة *
النشر هنا :
13/ 6/ 1431هـ

* ولعلّها أن تحوز على الاستحسان من الإخوان .

وقصيدتان في نفس الغرض على هذين الرابطين :

http://www.otaibah.net/m/showthread....=1#post1044935

http://www.otaibah.net/m/showthread.php?t=108484

التوقيع

الآراء كثيرة مُتباينة .. وتبقى الحقيقة واحدة .. تراها العين التى ترَى بالعقل من منظار النقل و الهُدى ، لا العين التي ترَى من منظار الفِسق والهَوى !؟ . . * تسعدني زيارتك ؛ فأهلاً وسهلاً بك : http://aashiqalhaqiqah1.maktoobblog.com/

آخر تعديل عـاشـق الحقـيـقـة يوم 27-May-2010 في 11:57 AM.