قالوا علامك مارثيت العود بابيـات = ترثـي بهـا شيـخ ٍ علينـا فقيـده
قلت امحلت ريضان فكر ٍ غزيـرات = وازريت اعدل في بيـوت القصيـده
هول المصيبه بدل القـول بسكـات = وانشلت افكاري عـن اللـي تريـده
نجم ٍ هوى واخلف نظـام المجـرات = واختـل ميـزان الحيـاة المـريـده
دنياً تغر وتسـرق العمـر سرقـات = تطوي سنينه مثـل طـي الجريـده
حتى ايش لو راحت حتى ايش لوجات = من عقب ابو متعب حياتـي زهيـده
الشيـخ شيـال الحمـول الثقيـلات = عقيد ربعه حي مـن هـو عقيـده
تصغـر بعينـه فالمحافـل كبيـرات = بالعـرف والاقـدام واريـا سديـده
ذكراه تبقى بالضمايـر ولـو مـات = راعي وفاء راعي خصـال ٍ حميـده
مرحوم ياشيـخ ٍ وقـف للمهمـات = مرحوم ياشيـخ القصيد و وعميـده
عساه فـي منـزال عالـي بجنـات = طالبـك يامحـي العظـام الهميـده
عسى العوض روس القروم القويات = رجال ٍ تنومـس فالليـال الشديـده
ابو رعد مع زيد ليـا جـات هيـات = تلقـى مواقفهـم تسـرك رشيـده
والشيخ ابو تركي ليا جات صعبـات = حـلال صعبـات القضايـا المكيـده
كلن وله ميـزه وفيصـل بميـزات = ما تنحصي ميـزات فيصـل عديـده
سلطان فيه الطيب وللطيـب رايـات = فايز وفـارس فالمهمـه طريـده
يارب تجمعهم علـى خيـر غايـات = وترحـم فقيـد ٍ ملتـزم بالعقـيـده