[أبن حشيان]

الا يا زمانـــي ليــه وجهـــك معـي غبر ... و أنا أجحد و أجاحد شوف وجهك على غبره

و أنا الظاهر اني صرت في وجهك الغبر ... اجامـــلك اباخــذ منك في سيرتــي عبره

تصافق بــي الايام ما بيــن هـــم و كبـر ... و الا اخــذ منك الا اللواهيــب و السبـــره

تجــاريب وقتــي كـــل يومــــن لها خبــر ... بعد شاب راسي وش نقصني من الخبره

لقيــت ان طبعـــك يازمـــن طابــع الجبــر ... تـــرحب بنبـــره و الضيافــه لهـا نبـــره

و لقيت ان حلوك يازمن علـــــقــم الصبر ... لو انـه محـــلا طعمــه المــر في صبـره

و لقيــت ان غيبـــــك ثبر و معايشــه ثبر ... يا كثـر النفـــوس اللي يعانــن من ثبـــره

و لقيت اني القرطــاس و أحداثك الحبر ... و على صفحـــة القرطاس كلن قرا حبــره

اضمد جروحــي و اجبــــر العايبــه جبــر ... لكن كسـر دم الوجه مااقــدر على جبره

اناجــي مع الحييـــــن في عالــم القـبر ... قتيلــن بــري و النــار تشتـب في قبــره

صبرته حسب مااوحيت و العن منه صبر ... انا يامحاكـــي وجهــك اللي نفد صبــره

يقولون طب النفس في الضيقه صبر ... و انا اقول طب النفس في الضيقــه العبـره

ماهو ذل و الا ضعف و الا قصــر شبــر ... عليه اللعنــه اللـي بكى من قصر شبـره

لكـــن الزمـــان و دورة ايامــــه الغبـــر ... تصغـــر مقـام الرجــل لو كـــان يا كبــره






الشاعــــر غلاب بن ود الثبيتي ...

آخر تعديل أبن حشيان يوم 03-Jul-2011 في 02:23 AM.