[سعد المسـعودي]

مع التحية والتقدير للزملاء .. نجوم وأعضــاء الموقع ....
أتشرف بالطرح أمام أبصاركم ..
ماتشرفت بإستقباله من الشاعر : فارس طلق الصوينع .. المعروف تحت معرف : قناص القوافي ..
كصوت المساجله .... والذي بدوري لم أجد سوى إستجابة الصوت بصدى مهما كان أقل من المتواضع ..
مقارنة برائعته ,.,, مع كل الأماني .. إن يعود الزميل : أبوطلق لأرض الوطن .. عالي الهامه ..
وهو يحمل الشهادات العليــــا .. ...



..................................


الصوت :


..
.

يوم الصوينع هاضته ضيقة الجاش=نوا مع المسعودي اليوم نيه
وارسله إبكار ٍ على عده عطاش=جمه قراح ويعجب الذود ريه
ونا جريح وطالبك لفة الشاش=وإلا ان حصل عطني من الطب كيه
اقولها والحال ياصاحبي ماش=في ديرة عن دار ابوي اجنبيه
لاتحسب ان الجو ينعشني انعاش=لاهبت انسام الهبوب العذيه
امسي بنواش ٍ من الشوق لي ناش=واصبح على صكات وقت ٍ قويه
ومخلاب وقتي للمغاليق نهاش=إله على جرح الرجل مقدريه
وحنا ترى نصبر على شان نعتاش=ونحايل الدنيا بروحه وجيه
ومن لايغيث النفس بالنفس, ماعاش=وناسٍ تعيش بذل, ماهيب حيه

..
.

الشاعر : فارس طلق الصوينع
( قناص القوافي )






()()()
()()
()
()
()()
()()()


الصدى :

..
.

يامرحبا وأعداد مارشرش رشاش = يروي ظماء أرض ٍ من دهرها سنيه
يشوش رأس العز .. للعز شواش = باللي له التقدير وأثن التحيه
مابين حكم العقل وأغواية الطاش = يستاهل الجزله زبون الونيه
الفارس اللي كف يمناه حواش = للطيب والامجاد والنار حيه
واله مع اهل لخيل مسري ومغباش = بحدب ٍ توثقها الكفوف الجريه
رأس ٍ سعاطيره على العز ماأناش = موثوق ساسه ورثوه الوصيه
للفارس القناص فعل ٍ على الكاش = على النعم يتعب ماخذاها عطيه
راع الوفاء والطيب من سـاس الأشواش= العـزوه اللي تحتمـي كـل هـيـه
من لابة ٍ عـن فعلهـا يقصـر اللاش= ويشهد لها التاريخ فالجاهليه
عين السعد يفـرح بها كـل منداش=وينعم تحـت ظـل البيـوت العليـه
يابوطلق لاشاش رأس الفخر شاش = لانك كفو يابو اليمين النديه
أما حياة العز ولاّ ترى بلاش = وجنسك قليل ٍ بين كل البريه
ماكنت أظن العقل للفكر غشاش= لوماقصربه عن مقاصد نويه
دام الحقايق حايل ٍ دونها أغطاش = فدوى النشامى يالوجيه الرديه
برهان قولـي حـق ماقلته فلاش = حر ٍ يشوم أرض المكان الدنيه
ماينهظـم حـق الرياجيل ببطاش=وأفعالهـم تاريـخ مـاهـي خفـيـه
وأختم كلامي عد ماترمش أرماش =وصلوا علـى محمـد رسولـه نبيـه

..

.


أخوكم : سعد المسعودي
( الحرالأشقر )

التوقيع

آخر تعديل سعد المسـعودي يوم 01-Oct-2011 في 05:22 AM.