مرتني سنين الرخا والمعاناة=وانا على الاطلال وآقف مكاني
يذكرني النسيان وانسى اني انساه=واليا نسيته لو دقيقة دعاني
كنّي سجلٍ مطوي جوف مخباه=اليا دعاه الشوق فز وقراني
والّا طفل ماتو هله ماتبناه=الّا الضياع وحظّه البهلواني
اليا تقدمته رماني بشلفاه=واليا سبقني خطوتين احتراني
ليت الزمن يسمح ببيعه ومشراه=وابيع حظي واشتري حظ ثاني
ياشين حظٍ ماعرف وين مرساه=يلعبه الموج ورياح الاماني
ضل الطريق وكل حظٍ تعداه=رغم انه اسطع من سهيل اليماني