يقول اللي وهب قلبه لنهابه=عساه فداه من بد المخاليقي
نهب قلبي وعلقني على بابه=وانامتغاضي وراضي بتعليقي
قضيت اجمل سنين العمر طلابه=على كور النجيبة ناشفِ ريقي
تسافرله وفود الشوق ورْكابه=وتنكف تحمل اطيافه مشاريقي
اسواة اللول والمرجان ماعابه=رداة السوق وهروج المطافيقي
وكاد ان المسا يبدا من اهدابه=واكيد ان الضيا من خده يفيقي
لفى المرسال يسلم راس كتابه=حروفه حافز لحومي وتحليقي
مزخرفلي حروف النور فكتابه=وانا ارسم نبض قلبي في طواريقي
يقول الشعر يزهى بك وتزهابه=وانا اقول انت تزهابك معاليقي
اليا ذعذع هواك وفاحت اطيابه=تبخّر كل همّي وانجلى ضيقي
اطيّرلك حمام الود واسرابه=من اغصانٍ على معلوقي تويقي
حروفك فاس وهموم الزمن غابة=وبوحك موسم اعيادي وتشويقي
نهار ان الفرح يهديك جلبابه=اقول اشرق نجم سعدي وتوفيقي
غلاك بوسط صدري ثبّت اطنابه=على وضح النقا مافيه تبريقي
يليق الك الغلا ياجنّة احبابه=وفيّ العهد صداق المواثيقي