الله مـن عبـرةٍ بالصـدر حابسـهـا=ومجنـدٍ دونهـا قـفـلٍ وحـراسـي
احكمت ابو تاج ثم وصيـت حارسهـا=يكون في معاملتهـا مـرن وسياسـي
لاتفجـر الـروح وتشّلـح ملابسهـا=ويبين خافى الضميـر لكـل بلاسـي
تـدري بهـا عالـمٍ تلفـت دسايسهـا=ولابـد للنـار منفـاخٍ ومحسـاسـي
اهـل الدنافيـس ماتتـرك دنافسـهـا=نقالة الحكـي بيـن النـاس والناسـي
رجالهـم قدمـك علومـه يملسـهـا=ولاقفيت صارت تشادي حد الامواسي
ابعد مجالي واجنـب عـن كنايسهـا=اللي تلم الردي مـن كـل الاجناسـي
وادلـه الـروح بالحسنـا واسايسهـا=وابعد بها في مكـانٍ مابـه اوناسـي
ابعد بها فى الخلا من شـان اونسهـا=وانـا طبيـبٍ لهـا عـذال ومواسـي
وابذل جهودي واضاعفهـا واكرسهـا=من شان جلب السرور وطرد هوجاسي
واحاول انسى جميع اللـي يعومسهـا=لوكان غالي مابا اللي يجرح احساسي
من وقتي اللي ولى روحي وعكوسهـا=كوى الفؤاد وحناني حنـي الاقواسـي
الجاش يرعى بهـا والكبـد حامسهـا=سوات بريـةٍ فـي جـوف محماسـي
حماسهـا دالـهٍ بالضـوء لامسـهـا=ومن بعد جمر الغضى تهرس بمهراسي
في هجرةٍ ظالمـه يرعـب تضرسهـا=تضرس اللـي بـذودٍ جلـه اسداسـي
اعمارنا اكلت خضرهـا ثـم يابسهـا=دنيا تلهـب لهـا نيبـان واضراسـي
ابـوك دنـيـا تشالتـنـا نوامسـهـا=ذعذع لها من براد الغـرب نسناسـي
تنهش وتعلن علـى الطيّـب تنافسهـا=واليا قضى خلته في شعب الافلاسـي
جربتهـا واعـرف الدنيـا ودارسهـا=سمٍ ذحاحٍ وقسمـي حـروة الكاسـي
لوطاف كانونهـا ماطـاف مارسهـا=فيهـا الهوايـل بليـا عـد وقياسـي
شقرا تعّـرض وكـلٍ قـال فارسهـا=لوكان مافاد فـي ماضيـه نوماسـي
شبـط بهـا لـو فعولـه ماتنومسهـا=لكن ضحك له زمانه قـال جساسـي
يملـك عقـارات وامـوالٍ يكدسـهـا=ماهمـه الا يعبـي شهـب الاكياسـي
واليـا تربـع وعـبـاده تريسـهـا=من هيبته حل فيهـم كتـم الانفاسـي
أتقـدر النـاس تقـديـر لنفايسـهـا=تنسى الشكاله وصار المـال مقياسـي
واللي ترفـع بنفسـه عـن دنايسهـا=وحط الوفاء والظفر والجود نبراسـي
قالوا حياتـه بـلا تخطيـط متعسهـا=اطيب لـه يكـدس اموالـه تكداسـي
عبادة المال صـار المـال هاجسهـا=لاخيلـوا بارقـه وصلـوه عساسـي
احـدٍ بعـد الطمـع نفسـه مغطسهـا=واحدٍ على جرته واحـدٍ بالارماسـي
ياعابـد المـال واربابـه مقدسـهـا=كم هو رصيدك ليا دقـن الاجراسـي
كربتك يوم المحاسـب مـن ينفسهـا=وراك ماتنتـبـه يالـدالـه النـاسـي
وش معك الا منهـا شبـت مقابسهـا=اسرع من الكهربه لاناشـت الماسـي
لو الخزايـن مـن الامـوال تارسهـا=ماتنفعك فـي نهـارٍ فيـه محتاسـي
من عقب غالي جواهرهـا وسندسهـا=تبي تضلي تطـق اخمـاس بخماسـي
لاتنخدع والطمـع عينـك يطلمسهـا=دنياك قصرٍ مزخرف هيّـن الساسـي
احترت في وصفها وان جيت اقيّسهـا=لقيت فيها الذهب مغشـوش بنحاسـي
وغنيت يوم الصبـا هبـت نسانسهـا=ماهو بحب وطرب من وقتي القاسـي
اشجـع الـروح بالمعنـى واحمسهـا=واخذ بها عن مجال الهـم مرواسـي
عسـى المثايـل تنسيهـا وساوسهـا=مثايلين مثـل لـون الـدر والماسـي
وابي هل العرف لاصتكـت مجالسهـا=يقرون قولٍ كتبتـه فـوق قرطاسـي
ويدرون حال العصيمي وش محرمسها=ومنها يعرفون ليش الشيب في راسـي
سبـة همـومٍ تداوسنـي واداوسـهـا=في هجـرةٍ تجعـل الاريـاق يباسـي
صقورهـا عـودت صيـد لفرايسهـا=الخرب فيهـا تعشـى لـه بقرناسـي
وسلامتك /ضاوي العصيمي