[مقعد الدغيلبي]

هاذي مداعبه بيني وبين الشاعر/تركي العصيمي وارجوا ان تنال أعجابكم

يامجاديف الغرام وياصدى صوت الحناني=ويا نسيم الليل داو الجرح والنفس العليله
طالت المده وانا أسامرك ياسهيل اليماني=ليله اشوفك وليله يحجبك برق المخيله
وأصتدمت بواقعي والشوق للعوده دعاني=وعودت المشتاق تنهكها المسافات الطويله
والمحبه والغلا والبعد وظروف الزماني=أرهقتني مير أنا مالي عن المكتوب حيله
آتصدى والزمان الشين مازعزع كياني= وأتحدى واتصدى وابرك الحملي واشيله
والفلك دوار والشدات للرجل أمتحاني= وألاماني ماتحقق بين يوم وبين ليله
ماعلا الدنيا قرار ولاعلا الدنيا ظماني= قالها اللي جرب الحلوه وذاق الحنظليله
علموا تركي تراني رحت فالرحله تراني=رحلة الاشواق سارت والله اعلم بالدليله
يابن مزيد ماشكيت الا الك عن قاصي وداني=حيث جربت الهوا قبلي وشارب من صميله
ماذبحني يالعصيمي غير مجلي الثماني=المنايا في عيونه والنعومه في جديله
عيطموسٍ وسط قلبي جالها قدر ومكاني= بنت شيخٍ له مكانه واطيب شيوخ القبيله
آلاصاله ورث جده والعبيه والحصاني=ينتمي للمجد (عفواً)مجدها اللي ينتميله
والحقيق طيفها سيطر عليه واحتواني=واستشلت عنفوانة قوتي وامست ذليله
والعلاقه بيننا مندوبها كوفي عناني =بس كوفي من فصيله والحبيّب من فصيله
عن وصاله ماحداني خوف كل اللي حداني=سلّم ابوي وسلّم جدي والمعاليق الاصيله
والنهايه يازماني وش بقالي يازماني=مابقى غير أنتظر مردود كساب الجميله

وهذا رد تركي ..
..

البدايه مرحبا ياشاعراً صغت المعاني= من هجوس الشاعر اللي مايهاب المستحيله
مايجيب المفردات الكايدات الا لساني=كل مامني نويتبها تجي بسهل وسيله
وان نزلت السوق مادورت ياكود السماني=من صغر سني ماجازيت السمينه بالهزيله
أتعصى بالسيوف الحدب مثل الخيزراني=واقدح الافكار من زندي كما قدح الفتيله
مير عبر ياقلم واكتب على الصفحه بياني= في خصوص الشاعر اللي مامشى درب الرذيله
الرفيق اللي عطى المندوب مكتوبه وجاني=يشتكي من جور خلانه وانا اللي بشتكيله
علموا مقعد يدورله من الشعار ثاني=والا انا ورطان في حالي ولاعندي وسيله
من بحور العشق والاشواق جاني ماكفاني=والمثل قال أعترافٍ بالحقوق أكبر فضيله
والله أني ماستعنت الا الاإله المستعاني=من عرف وزن الخفيفه ماجهل وزن الثقيله
يالبيبين القلوب وياطويلين اليماني=الهواء يعرف قتيله والمرض يعرف قتيله
والله يحقق مناكم ياكثيرين الاماني=الزمان الشين كم فرق خليلٍ من خليله
والقضاء يجري على متن الدقايق والثواني=زين والا شين مايكتب على ابن آدم يجيله
وانت يامقعد ماعدك غير واحد من خواني=مونسٍ لفح السموم ومونسٍ حر المليله
مير لاتطمع شيوخٍ شيدوا صرح المباني=خل بنت الشيخ عنك وروح دورلك بديله
لايوهقك الطمع يالادمي والعمر فاني=يامدّور ذاهبٍ ذهّبت والافيها عقيله
والسلام ختام عود أزرق وهيل وزعفراني=فيه ريح الياسمين وفيه طعم السنسبيله

التوقيع