يقول من شاقه طواريق الالحان = يجر من قلبه جزيل التماثيل
يرسم معانيها كما رسم فنان = من لوحة الماضي يجيب التفاصيل
هيض كنينه بالحشا دور الازمان = يومن بأثر يومن وليلن باثر ليل
دنيًا تقلب ماعرفنا لها شان = تحير اللي خابرين الدواليل
بنصبر على الدنيا ولو كان ما كان = نصبر لها صبر الجمل للمحاميل
ماهمنا وحنا على العز عتبان = اهل السيوف المرهفات المصاقيل
فرسان وقت الضيق شجعان ظفران = وعدونا تحت الرماح المظاليل
يشهد لنا خوض المعارك والاكوان = ليا حضرناها على قرح الخيل
ويشهد لنا اللي حاكمن يم برزان = ويشهد لنا زحول الرجال المشاكيل
وتشهد لنا دلالن ليا جو ضيفان = معطرات بريحة البن والهيل
ولو اكتب بربعي ثمانين ديوان = ما اوفيت ربعي حقهم يارياجيل
ومن ينكر فعول المناعير مرضان = يصدق اللي يحرفون الاقاويل
قل له يراجع في عيادات عرفان = يشيّع على قلبه وياخذ تحاليل