سعود العصيمي
والايا الجذع في تالي الليل مطلوب***على قاف والمعنى قراحٍ(ن) زلالي
قرينا كتاب(ن) عن رميثان مكتوب***ولا ادري حرام العلم والا حلالـي
سلطان الجذع
انا لن طلبني شاعر يسد فالنوب***اعده شرف لي ياكريم السبالـي
مادام ان لك عقل يقديك واسلوب***جوابي تعرفه ..قبل طرح السوالي
سعود العصيمي
نسدك لياجيناك في كل ماجوب***وتعرف علومي زين بين الرجالي
ابا اجابتك فرميث لنكان مذنوب***بعد ما لفى بالعلم يابن الحلالي
سلطان الجذع
مفصل علاك الثوب يالابس الثوب***لكنه عن يدينك كمومـه طوالـي
ترى اللي يجنب سكه الحق منكوب***ويشتال ماشالت ظهور الجمالـي
سعود العصيمي
والاياالجذع فنجال ابو زيد مشروب***ولا لك عن المكتوب في كل حالي
ابا اتوّب المذنب عن الذنب ويتوب***مادامه مسوّلي لـه علينـا مقالـي
سلطان الجذع
ترى مانت في درب البهاذيل مغصوب***على الهون خلك يالرفيـق الموالـي
يقولون كـل الـدار يالطيـب دروب***ولا ادري انت رحت يمين والا شمالي
سعود العصيمي
نحسب الحساب ونحفظه وسط حاسوب***ولانقـرب الـزلات والحـظ عالـي
كلام الشريف اللي على الطرس مقلوب***انا ماخبرتـه فـوق عمـي وخالـي
سلطان الجذع
مادام ان ضوك ياسعيدان مشبوب***ابا اسقيك انا كاسين مر وحالـي
كلام ماهو بين الرياجيل محسوب***عنه صد لاتشره عليك الرجالـي
سعود العصيمي
لعلك توعوّد مانت فالراس مضروب***انا ماحسبت احساب زيـد الهلالـي
يبا يرغبونه لو ماهـوب مرغـوب***وتصبحه تشيله فالكـلا والطحالـي
سلطان الجذع
ليا جا مناوش بين الاثنين وحروب***ترى ماتحمل ضربه من عقالـي
مادام ان حقك معك ماهو بمسلوب***غنيمه غنيمه في تـوال الليالـي
سعود العصيمي
تقوله بعد حطيت الك راس وجنوب *** وجبتك من اديار(ن) عليها ظلالي
مايطمع بحقي غير خبل (ن) ورعبوب*** خذ العلم ياسلطان ياهم الالي
سلطان الجذع
انا قاضي الديره وللدار منصـوب***علامك علامك بالنواقص تلالـي
تدير المنيحه وقت والديس محلوب***ولا ادري ذكاء ياسعود والا هبالي
سعود العصيمي
لاقاضي ولا مفتي ولاانته بمسبوب***سوات العرب واحيان مالك مجالي
من الله ومن خلقه مقدر ومحبوب***مكمل من الكامل جليل الكمالـي
سلطان الجذع
بعد جاك فنجال من الكيف مصبوب***لي تمد فنجال مـن الكيـف خالـي
ترى مانت كامل لازمن فيك عذروب***ولافيه كامـل غيـر رب الجلالـي
ابن العم العزيز /سلطان
تشرفت
بمجاراتك
وبيض الله وجهك
وشكرآ لك
ولمن شاركنا
البدايه كانت عندي والنهايه عندك
تحياتي
| التوقيع |
اللي على كيفه يجي والاّ على كيفه يروح = إن راح في حفظ الولي وإن جاء هلا واهلآ هلا.
ماني على قربه شفي والاّ على بعده شفوح = الله خلقني مااعترض من صد من كل الملا.
|