يقول خالي كنا ذاهبين في رحلة صيد ويوم صدنا مجموعة تشاورنا واقلنا نبا نطبخ الغداء والله ونسير شوي اليا فيه غار قنا بس هذا هو المكان الزين ؛؛؛؛؛ واليا فيه سيارة قنوص يبون نفس الغار وقمنا نتسابق على الغار المهم وصلنا سوا وطلعوا اهل السيارة عتبان ومعهم شايب مهو عتيبي وراحت الدعوى مزارق طيب وجمعنا الصيد وخلينا غدانا واحد
الحاصل ان معهم رجال شعر راسه ابيض والله مادري من اي قبيله الى حد الان وسالفة تجر سالفة وتطرقنا الى روق وبرقى ايهم اطيب من الثاني فاحتكمنا الى الشايب فقال : انا ابعلمكم بقصة جرت علي وانتموا احكموا
يقول:
كان فيه صديق عزيز علي من نفس القبيلة او قال ولد عمي ؛ المهم انه ام صديقه قامت الصبح قالت يافلان وان كسبت لي ناقة اليوم!!!
المهم يقول جاني صديقي وقال تكفى خاوني امي تبا لها ناقة نبا نسري يم الشمال لعل الله يرزقنا بذود مفلي ما عنده احد ننهبه وبعد مسير يومين لقينا البل العفر اللي ودك بس تناظر فيها سمان ونصها خلفات ولاعندها احد قلنا بس هذه هي المهم اقتفيناها وقمنا نسوقها وبعد شوي طلع لنا خيال وبعيد ولحقنا قال على وين يالنشاما قلنا: مروحين باباعرنا قال اجل هي لكم قلنا ايه قال زين وهو يضرب خوي بالشلفا على جنب بطه وشقه والتفت يمي وقال اخذ عمامة خويك واربط بطنه وقرب المظهر هذاك وحطه عليه وامش قدامي اخذت العمامه وسويت مثل ما قال :
المهم يوم وصلنا بيته قالي نزل خويك ونزلته وهو يزهم العبد وهو يجي قال للعبد انحر الصويب هذا قام العبد واخذ السكين وحطها على رقبة خويي والتفت يمي الفارس وقالي بصوت عالي ونبرة غضب شديدة امسك رجلين خويك لايتحرك المهم سويت زي ماقال ومسكت رجلين خويي وهو حاطن الشلفا في علباي لين ماقطع راسه العبد وبعدين قال لي قم روح لهلك ثم لياسألوك عن خويك قل لهم ذكاه شبيب بن حجنه؛
وانا احفش الثوب وانا ماني مصدق اعدي واطيح والتفت وراي ليكون لاحقني لين ماوصلت العرب في نفس ليلتي خبرتهم مثل ماقال لي قالوا شبيب قلت نعم وانا كنت مااعرف شبيب
المهم يقول يو م اصبحت ليا العرب شادين مغير بيت ابوي لحاله وابوي كبير فالسن المهم نشد ونلحقهم...
ثم والله ان هالشيب اللي براسي انه من ذاك اليوم طالع.....