وصل العطياني
مرحبا ترحيب ياصل كل واحد في محله =عبر خط التيلفون وشاشة الحاسوب الالي
الدميحي صاحبي يستاهل الترحيب كلّه = في قديمات الليال وفي جديدات الليالي
عبد الله عتقان
بارك الله فالرجال اللي على مذهب ومله=والحقيقه مايعرفون الرجال الا الرجالي
خلنا ياوصل نسعى فالديار المستقله=مرةٍ صوب الجنوب ومرةٍ صوب الشمالي
وصل العطياني
أسمع إنـّك بانيٍ لك عند شطّ البحر فلـّة = وآخر الأيام قلت إن البحـَر كلّه حلالي
خـلّ راع المعرفة يعطيك ربع العرف خلّه= تستفيد وعِرفة الطـّيــّب تراها راسمالي
عبد الله عتقان
أنت تسمع في كلام الناس لو من دون أدله=كيف تسمع في صحيبك هرج قيل وهرج قالي
جايب إلك غصن شجرة مايظل الناس ظله=ودك أنك تغرسه بين المحايا والعوالي
وصل العطياني
أنت قلته والله أعلم عمـْـد والاّ جات زلة ؟=ما دريت |إن الإجابة نصـفها فهم السؤالي
الحقيقة ما تغيــّر ردّ سيفك لا تسلـّه = والجمال اللي تعوّد خير من بعض الجمالي
عبد الله عتقان
خطوة الخايف تردد بين خوف وبين ذله= والشجيع إسابق أنسام الهبايب ما يبالي
نجمك اللي ترقبه بين النجوم اللي مطله=موقعه ماهو طبيعي بين الأقصى والموالي
وصل العطياني
المذيع الاجـودي نقـز عيونـك بالاخلـه =وانت يفجعك السوال اللي يجي مثل الخلالي
لا تعايـن فالنجـوم ولا تعايـن فالاهلـه = مابدا لك في سماها لا نجـوم ولا هلالـي
عبد الله عتقان
ا
المذيع اللي يقدم علةٍ ياوي عله=يوم يعني ماعليه ويوم ما يسوى ريالي
والولد مهما تغير مولده وألأ سجله=مستحيل أصدقك لو قلت واحد من عيالي
وصل العطياني
إبذل المجهود وإن حدّك على الإحراج قلــّـه =يا مذيع أرجوك خفف لا تدربيها ثقالي
علّموا شاعر سليم إن كان علمي ما فطن له = البعير اللي عليه الوسم أخير من الغفالي
عبد الله عتقان
لا تعاتبني لاحالي عاتب اللي سامحله=وأعرض الدعوى على أصحاب السعاده والمعالي
والله أني يوم أطالع صورته وسط المجله=مالقيت أمن الشبه غير العمامه والعقالي
وصل العطياني
أنته اللي رحت له ما جاك نازل في مظلة = مير جعل الله يفرج لك يا بدهان الرمالي
لا تذمــّه ما انت واصل ربع ميصال وصلّ له = ما يذمـّه غير رجال من المعقول خالي
عبد الله عتقان
مادريت ان الخطاء في صاحبي طبع وجبله=لو دريت أبعد طريقي عنه لو أجلس لحالي
بيض الله وجه أبوه وكل رجلٍ فازعله=أشهد إن أعتيبه الهيلا مكرمة السبالي