بسم الله
مشاركه من اجل التواصل وعدم الانقطاع
ارجو ان تنال رضاكم (وما توفيقي الا بالله)
دن الرعد واسترسل الغيث يا عماد= كنه لعشاق الاناسه ينادي
خيل على منابت اديار الأجداد= اديار مرويت السيوف ألحدادي
دار ألوفا دار الكرم دار الأمجاد= أهل النقا وأهل التقا والمبادي
هذي ثمان اليال بارق ورعاد= وغيث مغيث وجو زين وبرادي
هواه لا ذعذع شذا يشف الأكباد= أتقول مختلط بعنبر وكادي
وعقب ثمان الليال ما عاد يزداد= اخذ أسبوع صحو والجو هادي
ثم إهجدت في تالي الليل مهجاد= سحابة من عند رب ألعبادي
ثم لبس البيدا من الحسن سجاد= نبت الخزاما والنفل والعرادي
وقامت نواويره تعاينها الأشهاد= اتفوح عطر وعطرها غير عادي
لو يجمع العطار زافات وأفراد= على عطور مجمع العطر زادي
وفيها (أم سالم) يوم تزعج بالأنشاد= اخير من فرقة ((رشاد وعبادي))
وفيها ضمير مكابد الهم ينقاد= ويدله وينسى الهم والانفرادي
وعقب التعاسه والنكد والتجلاد= اتقول بالعله مع الصبح رادي
ومضارب الأسهم وتجميع الاقصاد= لا طبها بأغلى ما يمك يفادي
لا داج فيها يوم من غير ميعاد= ينسى سهم (سابك) وسهم (ألبلادي)
وصفت شي ووصفها يا فتى زاد= أوجزت فيها لو يجوز التمادي
من دوناه ما فيه راحة ومقعاد= هذاه والله الكلام الوكادي
ما عاد فيني صبر ما عاد ما عاد= كن الدبا يرعى منابت فوادي
وان كان إبه عيدين من خير الأعياد= شوف الفياض الخضر ثالث عيادي
أخير من مجلاسنا عند الأسياد = اللي سيادتهم ملم الدوادي
أسياد مجلس كره ونفاق وعناد= ماهي سيادة عرف ولا شدادي
الكل منهم صار فاهم ونقاد =(إفلان طبعه زين وفلان غادي)
يقنص عيوب الناس من كل مرصاد= وهوه مغن العيب ولانتقادي
وإن قلت يا صياد لابد تنصاد= وتراك عن سلم الرجال متحادي
قال الله الله ما عن الناس نشاد= اتقول يحداهم على الزور حادي
واخير منهم شرب دله وبراد= في بطن فية ضلع في حيد وادي
من بعد جود اللي بجوده لنا جاد=هذا هوى نفسي وغاية مرادي
هيا معي يا شوق مركوز الانهاد= خوتك تغني دون شربي وزادي
أخير لك من شوف عابد وعباد=عشاقة السامر وحي البوادي
هذا وصلى الله على نبع الإرشاد= وعسى عدوه يغتشيه السوادي
| التوقيع |
القاف لن باحت قوافيه ينهار= يشيب لاكنه معي مايشيبي
وصرفت من بالي تصاريف بيطار= ينقد مثامين الكلام ألأديبي
وبنات فكري بالمثامين تجار= وعلي مايصعب صعيب الصعيبي
ولأقول ما غيري من الناس شعار= لأكن ميزة شعري إني عتيبي
أسمٍ بنا في عالي المجد ميكار= عز الرفيق منزحين الحريبي
|