[عـايض النفيـعي]

إليكم هذه المتواضعه فـ أقبلوها ..

ياوجود اللي كفوفه مـن الأيـام بيـض = حاوزن به سـود الايـام مـع شيّابهـا
أكتب أكتب يا ( عطالله ) وبالخط العريض = الهجـوس مسانعـه والله اللـي جابهـا
جعله فداك الردي راعي الوجه البغيـض = دوّن وبعلمـك وش يشـيـل كتابـهـا
لا تكثّرها على اللي يهيض ويستهيـض = والطروق اللي تنقّـد ماقـط غنّـى بهـا
ينقض ويفتل ومعناه من غيض ٍ وفيـض = ولا نطق له كلمه اللا يحسـب حسابهـا
أوحني قدّام ياوخي توحي لـي جضيـض = الليالـي ماتومّـن ولا يــدرى بـهـا
شف بلاويها تحاذف وكل ريع ٍ يفيـض = والبشـر فـي فيّـة سيوفهـا وحرابهـا
والبشاير حادره مع سحاب ٍ له وميـض = القطا تضماه .. هـذي سـوات ارقابهـا
لـأستوت عند العرب فالمشتّا والمقيـض = دوك علم ٍ مانقلتـه العـرب لـأعرابهـا
البنادم صار دمّه مثـل دم ( المحيـض ) = واللحى تكـرم وتكـرم طـوال أشنابهـا
راحوا الصدقان قـوم ٍ ياربّـي ياحفيـظ = تضحك بوجهك وتوحي ضريس أنيابهـا
تشتبه برق العبي والقداحين الكضيـض = شالت ولا شالت الـلا تـرى استيعابهـا
رح وعلّم واحد ٍ جا يبـا منّـا اتعويـض = لا يجينـا كنّـه اللـي تحـرث نصابهـا
إن سكتنا جا من أقصاه حقد ٍ مستفيـض = وإن تلافتنـا عجـوزه تطـر ثيابـهـا
علّم اللي عايف ٍ جنبه الطرف الغضيض = رفقة ٍ لا هي بتغـزي ولا يغـزى بهـا
النميمه جمرة ٍ في ذرى قلـب المريـض = صلوها ياصل وقلب المريض أولى بهـا
شبعته ترى مثل شبعت أكّـآل القريـض = جايـع ٍ جـا للنقايـد يطـق أبوابـهـا
نعنبوا هالراس يالدرن أبو لجـن ولفيـظ = هرجة ٍ يبشربها الـدرن مايشقـى بهـا
والدجاجه تنجب البيض والحـرّه تبيـض = مار ياهنيّ الدجاجـه علـى مخلابهـا !!
يالك الله دونه الحلم والحكمـه فضيـض = نشّهن بالمـرو والنـار أخـذ مشهابهـا
الجزا جنس العمل يابن أبويه لا يغيـض = واحـد ٍ قلّـط فعولـه ولا هلّـى بـهـا
اجني أعلّمك وينه وأعلّمـك الحضيـض = الحضيض اللي حكت بقعة ٍ صلّـى بهـا