[ابراهيم الزراقي]

بسم الله الرحمن الرحيم

هذه قصيده وطنيه اتمنى انها تعجبكم واتمنى منكم إبدا رايكم فيها

ياهاجسي كب الغزل والمواويل=ودور لنا ياهاجسي كل غالي
عطنا القصيد الي يزيل الغرابيل=عطنا البيوت النادرات الجزالي
اليوم يوم المدح ماعنه تبديل=والمدح مابه فالنشاما جدالي
وان جيت ابا امدح فالرجال الحلاحيل=سقت المدايح مثل سوق الدلالي
لخوان نوره مشعلين القناديل=اهل الصطر من ماضيات الليالي
اهل القنا والرمح والسيف والخيل=تاريخهم بالطيب ماضي وحالي
نسل الزعيم الفيصلي قاسي الحيل=عبدالعزيز الي بنا المجد عالي
المرجله ماجاتهم بالتساهيل=جتهم طناخت راس فعل ومقالي
ناسن رقوا بالطيب للجدي وسهيل=ونالوا من الامجاد مالا ينالي
ناسن لهم بين النشاما مداهيل=ماهمهم فالوقت غير المعالي
ماهمهم فعل الرخوم المهابيل=اهل الدسايس والعلوم الهزالي
الي لهم مقصد على مثل ماقيل=يبون شين ماحصل فالخيالي
تستروا بالدين كذب وتضاليل=وحنا عليهم مثل وبل الخيالي
حنا لبو متعب سيوفن مصاقيل=حنا جنودك ياكريم السبالي
دون الوطن ماهمنا القال والقيل=هذا وطنا والوطن راس مالي
وان كان ماقمنا بكل التكاميل=ماعاد ينفع لبسنا للعقالي
ياسيدي كان الزمن قرب يميل=حنا حزامك في جنوب وشمالي
حنا سندكم فالليال المقابيل=حنا سندكم من قديمن وتالي
حنا هل الوقفات من جيل لاجيل=عتيبه الهيلا زحول الرجالي
اهل الكرم والجود ذباحت الحيل=لطامت العايل نهار القتالي
من دون قاصر في جميع المشاكيل=كلن له بدرب المعالي مجالي
شعبك يابو متعب حصونن مضاليل=كلن يفادي للوطن بالعيالي
دون الوطن جولك جموع وزرافيل=كلن بسيفه يحتمي مايبالي
وختامها صلاة ربي بتكميل=على النبي عداد وبل الخيالي

آخر تعديل ابراهيم الزراقي يوم 04-Jan-2008 في 08:39 PM.