مرزوق حمدان العتيبي
يامرحبا ترحيبة التقدير والقصد الشريف = بالشاعر اللي لابغا التشخيص يقلب غترته
هذا السماري ياجماعه مانشوفه في جنيف = حده حدود المملكه ماهي بعيده نظرته
السميــــــري
الك البقا يلي ترحب والله بخلقه لطيف = ولاّ ترى بعض العرب يحفر وطاح بحفرته !
وانته وين أنته ماتعدّى من بقيق اليا القطيف = وفي تالي الأيام و(الشيعي) تفضّل عشرته
مرزوق حمدان العتيبي
المشكله غرتك نفسك تعتقد مالك وصيف = وانته كما اللي لوبغا يطمر قصيره طمرته
آ ثرك قلبك ممتلي بالحقد واحسبه نظيف = ليتك تشاور واحد ٍ عاقل وتاخذ خبرته
السميــــــري
(رشيد) مايبلاه في نفسه كما المبلي ( منيف ) ! = ومرزوق مثله فالمشاكل ماينزّل عجرته !
ماودي والله ياولد حمدان أحدك للرصيف = آمسح على راس اليتيم اللي خنقته عبرته !
مرزوق حمدان العتيبي
مازعل حبيب سوى تركي بمنطوق ٍ سخيف = وحبيب العملاق ماتمشي علاه العفرته
يا صاحبي ماودي اكلفك بالحمل الكليف = الداب ندمغ قلته وتموت فوقه شجرته
السميــــــري
والله يامرزوق لولا الدين والشرع الحنيــف = إني لحشر اللي يدور عند ربعه حشرته
عمر الهبايب ماتحرك من حصى الضلع المنيف = (ياليت يفهم للعباره قبل يلقى عبرته !)
مرزوق حمدان العتيبي
انته علامك منزعج مني ومنطوقك عنيف = غديت مثل اللي على عمه يحدد شفرته
بالله انا بنشدك لو جالك من العتبان ضيف = تبا تكمل سفرته ولا تهمل سفرته
السميــــــري
لانك مراوغ والمراوغ ماله الا حد سيف = واللي يحط الجمر قدمي تاطا رجله جمرته !!
يصير هوّ معزبي وانا له الضيف الخفيف = ولاّ أنت وش رايك بضيفٍ دق لك من نمرته ؟
مرزوق حمدان العتيبي
ياصاحبي ماوصلت انك تجرد السيف الرهيف = دام العلوم مناقشه والرجل نفهم نبرته
انته تقوله بس واقعكم ترى واقع مخيف = اللي طلب خوتك هاك اليوم ترفض حضرته
السميــــــري
الظاهر أنك خفت واطرافك من الذله رجيف = لكن قلبي لك يابن حمدان فاتح حجرته!
حال الضعيف أقشر منه ياصاحبي .. حظ الضعيف = واللي يضيع للأمانه كيف تقبل عمرته . !