ناصر الجلاه
سلام رديةٍ مابعدها ألا هجوم=حربٍ توجه صواريخه على القاعده
يامعجب الليل دام البرق قاد الغيوم=وإن قمت يابن العطاوي فأستمع راعده
معجب العتيبي
يامرحبا ردةٍ حسب الادب والسلوم=من قوها تطرح اللي فالسما صاعده
ياكبر بعض السوالف والحكي والعلوم=برقٍ يجي صيف يالعربان من شاهده
ناصر الجلاه
وألك البقا والطيور الجارحه لاتحوم=ترى القريبه في تال الوقت متباعده
من طاح وقت الشدايد كيف بالله يقوم=وقت الرخا لايساعدني ولا اساعده
معجب العتيبي
مافيه طيرٍ لبس بين الخلايق هدوم=حتى ولوهي على الموضوع متواعده
ياناصر سيوفنا ماصار فيها ثلوم=وان صار ياصاحبي لاترجي الفايده
ناصر الجلاه
يابايعٍ للبضاعه ليش ترجع تسوم=وانته تشوف المرض فالكبد والماعده
ماينفعك سيف وسط البحر حول وعوم=وألا تقاعد ترى الاجواد متقاعده
معجب العتيبي
الامر ياصاحبي مافيه شي محسوم=ولاشفت تاجر ثقه ماني بأنا جاحده
اعوم واخذ نصيبي بأولات الرقوم=يوم ان غيري عزومه دايما بارده
ناصر الجلاه
بعض السوالف تراها ماتسد اللزوم=لاهيب لاصادره لاهيب لاوارده
وش لون انا اصوم قلي وانت لاماتصوم=اقوالنا بينه وفعولنا شاهده
معجب العتيبي
ماضيّع الناس تال الوقت غير الشحوم=ياماقشر المويه اللي دايما راكده
بعض العرب صام لكن في حياته ظلوم=يظلم ليامن بغا ويسجد مع الساجده
ناصر الجلاه
بندقك ياصاحبي عند الهدف في زموم=ياليتها جنب مقصدنا ولو يارده
ماأدري وش الخيره اللي تنطبع بالختوم=ياللي تبى النادره والنادره فارده
معجب العتيبي
ياصاحبي لاتبيح السد عند العموم=واخلي السالفه ترحيب ومعايده
الناس للناس معطى ومهدي ومحروم=والناس فيها من السادات والسايده