[ابو سعد الدلبحي]

الله يعطيك العافية يالغالي وإسمح لي بتنسيق القصائد

قصيدة راكان بن حثلين:

الطير يازبن المناعير يفداك = نبغى العوض بالطير خطو النداوي
نبي اشقرن عل المنايا تعداك = اللي الى جا الخرب ما هوب ياوي
نبي العديم اللي من الربع شرواك = مضرب كفوفه يودع الخرب هاوي
واسلمك سيفً صقيل بيمناك = واضرب علي ياشيخ ما كنت ناوي
والله ماتعطيه يمناك يسراك = لاشفت وقعه في كبار اللهاوي
اسمع كلام اللي على الطيب ينخاك = واترك كلام اللي عن الطيب ثاوي

رد حمود العبيد الرشيد:

قصيدك اللي يابن حثلين دهواك = تضرب على طاش البحر ما تراوي
واذهبت يام في قصيدك وحمراك = وبعته برخصً عقب ماهم غلاوي
وقول بلا فعل به الناس تقفاك = والحكي ببلاشً وشرب القهاوي
غديت مثل افداوي الله يبلاك = وعرضت يامً للمحن والبلاوي
كم واحدً في جرتك يتبع رضاك = من عقب ماهو من كبار الهقاوي
لولا اخو نورة جابلك يوم جلاك = تموت وانت مع الاجانب خلاوي
وقصيدك اللي تذكر الطيب خلاك = تحت نحور الخيل مثل الحذاوي
واخبر ترى ما جاك من فعل يمناك = معه كثير الحكي هو والحداوي
وان طعت شوري حط حكيي بمعناك = ولا تصير بكل حال افداوي
ترى الفداوي ذمة الله شرواك = والهذر مذمومً وكثر اللغاوي
واقول رجل ما يخافك ويدراك = لا هو ؟؟؟؟؟ولا هو حساوي
في ضل شيخ بالمراكيض خلاك = بالمجمعة بظلال عطب الاهاوي
واحرص من اللي يوم حما تنصاك = وخلاك تمرح في شعيب خلاوي
وان كان تبغى النصح حنا نصحناك = ماهي كثير الهذرمة والحكاوي