الاخ الكريم ، أبن هوازن ، بعد التحية ، أخي الكريم أنا قصدي من عرض أسماء شيوخ وفرسان مطير اللي راحوا عند عتيبة أو شيوخ وفرسان عتيبة اللي راحوا عند مطير ، قصدي منه أمران لا ثالث لهم ، وهو على سبيل الاستدلال فقط هذا أولا ، ثانيا كسر الحاجز لدى البعض!!! ، ويا ليت نرجع للموضوع الرئيسي وهو عن قائل القصيدة ، اللي فتح الموضوع مسمي نفسه نيروز الظاهر واللعلم عند الله رافضي! ، ولكن أسمحلي في بعض التعديلات والاسئلة بالكلام اللي قلته أخي أبن هوازن .
أما عن الدوشان اللي أنت ذكرتهم فصحيح قتلوا وذلك في كون المجمعة على فيصل الدويش من قبل الامام عبدالعزيز بن عبدالرحمن بن سعود ومعه قبائل كثيرة منها عتيبة ، بعكس القلة العددية للدويش وقتل في كون عبدالعزيز على الدويش الاعلام اللي أنت ذكرتهم ، أما باقي شيوخ عتيبة اللي أنت ذكرتهم فقبل التعقيب على اللي ذكرته أنا ما حبيت أقول فلان ذبحه فلان أو الطريقة التي قتل بها سواء بسيف والا رمح والا بندق والا شلفا وكذلك قتل غدرا أم لا ، كما بينت لك سابقا كل هذا على سبيل الاستدلال أما سالفة أبن مذيخ الميزاني فوالله ما أدري عنها ولو ترجع لكتاب أبن بليهد راح تعرف كيف قتل تريحيب بن بصيص لكن الهدف التعلم للطرفين ، بالنسبة لسالفة مقتل هندي بن حميد أنت تقول توفي في الحجاز وكان شايب هذا يا أخي أبن هوازن ما يمنع أنه يقود معارك فمقدم القوم يقود معارك لين يموت وأظن مصلط بن ربيعان قاد معارك وهو شايب ، ولي وقفة لاحقا على سالفة هندي بن حميد ، أما سالفة باقي الحمدة مثل هوصان بن حميد وضيف الله العفار ، فمطير تقول هوصان ذبحوة الجبلان وفي قصيدة تدل على هذا راح أجيبها بعدين والعفار طرحه في المعركة واحد من ميمون وقتلة عثمان بن بصيص ، وحين رجوعي لكتاب (حياة البادية في نجد) تأليف ضيف الله بن عوض العتيبي ، وقد ذكر نسب الحمدة وشجرتها وفصل عنهم قال هوصان أذبحوة مطير ، أما العفار لا والله قال مثل سالفتك بالضبط وزاد عليهم تني أبو عبية المقاطي ، أما بالنسبة لمرزوق بن محيا تقول معاصر اخوان وناصر بن براز بن محيا تقول مات بعد طلال ، أسمع يا أبن هوازن حنا نبحث والبحث ما يزعل أحد بالعكس مفيد للطرفين وحتى لو كانت غلطان وأنت صححتلي بالعكس أكون شاكر لك ، مرزوق بن محيا قتلوة مطير ويوم درى أبوة ناصر بن براز بن محيا قال :-
يا هل النضى دوري مرزوق --- أبوكم ينخاكم علاه
المنع ما يرفع ربعن فوق --- كود من رب الملا نجاه
فرد عليه أبن جبرين قاتل مرزوق ، يقول :-
الله يكب شدادكم يا روق --- من يوم جيتوا تباه
اللي ذبح بيدينا مرزوق --- أبوة أنشاء الله يبا يلقاه
وبعدها غزا ناصر بن براز بن محيا مطالبا بثأر ولده مرزوق فقتل في هضبة ضريح وكان معاه عبد وقال :-
راعيك يا الشقح النوار --- طريح في هضبة ضريح
هذا مغارا صار عار --- ---------------------------
وقد تطرق لهذا الامر سعد بن جنيدل بأختصار في كتابة معجم عالية نجد في صفحة 515 .
أما الشغار فمعروف قصيدته في عياله اللي راحوا عند مطير ، وقد نشرها محمد العصيمي في كتابة شعراء عتيبة ، ومن ضمن ما يؤكد كلامنا قوله:-
يا شعيل وين أتلى نجوم الربيعي --- عزي لمن مثلي غداله بضاعة
شوخن نسبهم من القبايل رفيعي --- اللي لهم طرح المجوخ ولاعة
اليا أعتزوا بنوضى وحصة جميعي --- الخيل ما تاخذه بهم كود ساعة
على نفي يا شعيل خلي جضيعي --- من عند (عبدله) بهاك الرفاعة
والقصيدة طويلة.
ومن طرف ضيف الله بن عميرة وتقول ما أنقتل في معركة ، السالفة معروفة وذكرها أكثر من مصدر معاصر لها مثل العبيد وأبن بليهد وهي بأختصار أن أبن عميرة ومعه 100 مركوبة لقى 27 مركوبة من مطير على ضيف الله بن موهق بن سقيان وطاردهم لين أدخلوا ضرية وأميرها وطالبه أبن عميرة يطلع المطران اللي عندها ورد أمير ضرية أنهم في وجهي لا تقطع وجهي ، وبعد جدال طلب عقيد مطير الامان من أبن عميرة حتى لا يحرج الرجال اللي مدخلة وقاله أمهلنا لين نطلع مع الريع ثم سو اللي تبي وبالفعل التزم ضيف الله بن عميرة بكلامة وطاردهم بعد ما طلعوا من الريع وبعدين رماة أبن موهق في الطراد ورميته صابة راس أبن عميرة ومات في لحظتها.
أما كلامك عن زهيان بن عصاي نعم صحيح.
وأما كلامك عن مشعان البراق ، أقول بعد ما قتل محمد البراق أخو مشعان بعدما قتل صمدان بن سقيان صارت معركة بين مطير وعتيبة وأسروا مشعان البراق بعد المنع وكان مانعة أبن هدباء وحاولوا السقايين قتله ولكن جهز بن شرار تدخل الموضوع وقال هذا ممنوع ما يقتل مير أخذوا فرسه وخلوه ، وفعلا أطلقوة وبعد مدة حصلت معركة بين مطير وحرب كانوا على الذويبي وكان مشعان البراق ماخذ أما بنت الذويبي والا أخته الوكاد يوم صارت المعركة كان البراق مع أنسابة الذوبة ضد مطير وقتل على يد مسعود بن قرناس ، وأشكرك على الاضافة وأضيف لك فاجر السلات وشليل بن نجم وأبن تنيبيك قاتل تريحيب ، هذا من طرف شيوخ وفرسان عتيبة اللي راحوا عند مطير ، وما أدري هل غطيتهم كلهم والا لا .
أما بالنسبة لشيوخ وفرسان مطير اللي راحوا عند عتيبة لي تعقيب على كلامك ، الدوشان اللي أنت ذكرتهم عند عتيبة راحوا في معركتين وحدة بالحمادة وذكر أبن بسام قتلى الدوشان فيها لكن المرجع مو معي الوكاد أثنين دوشان ذبحوا ، أما الجبعاء ومحسن بن زريبان وحسين بن شوفان قتلوا في كون المجمعة يوم كان أبن سعود على الدويش ومعه عتيبة وقبايل ثانية كما هو معروف ، أما شيوخ مطير الاخرين اللي ذكرتهم أنت والله ما أدري عن بعضهم لكن يوم قلتها أنت أكيد متأكد ولاهي غريبه أنهم مذبوحين عند عتيبة كعادتها في ذبح الشيوخ ، بس يا ليت تعرف وشلون أنذبحوا عشان تفيد خويك الباحث عن المعلومة ، خصوصا أصابة الدويش ، وسالفة المبيحيص هذا عاد ودي أسمعها وعرفها رغم المطران ما يقول فيها وأنا ما أعرف عنها شي .
أكثر شيوخ وفرسان وعقداء مطير راحوا عند عتيبة ، والعكس صحيح.
تقبل تحياتي أخي أبن هوازن ، مع تحيات نقال هم مطير (الغطفاني) .
الاخ بعيد المرامع ، أنا من يوم دخلت في هالمنتدى وأنت كن راكبك أبليس! ، قول لا اله الا الله ، الدعوى سهالات ، هذا ونت مشرف عام! ، على العموم أنا يوم قلت أدخل على الله ، قصدي أني يوم قلت قتل هندي بن حميد ما بغيت أكمل لانه يقال أن ذبحته بشعة ، عرفت القصد هالحين ولي عودة وأنت ليلك طويل ، تحياتي .