كبتن عتيبه
يامرحبا يالشاعر اللي جيتنا طُرّقي وضيـف=لَكِنّ ريّض خطوتـك يالطُرّقـي العجلانيـه
ترى المعاني كنّها مزون المطر تمشي صفيف=وأن لاح برّاق الحيـاء بسـم الله الرحمانيـه
رحيّم الغنامي
دام البقا و انا هنيا ضيف و انت المستضيف=يا معزب الضيفان سوق الكيف للضيفانيـه
عيني تخيل المزنه اللي برقها جاله رفيـف=لكنّ مدري عن بروق الصيف في الامزانيه
كبتن عتيبه
يارحيّم أنته لك ثمان سنين فالشرطه عريف=لكنّ ابا ارقّيك (ظابط)فـي وظيفـه ثانيـه
ماهو بلازم مايعيش الروقي الاّ في عفيف=الخير واسع والسّعه في ديـرة العتبانيـه
رحيم الغنامي
مكاتب التوظيف اورى في وظايفها واعيـف=الدخل ما من دخـل وعظـام البنـادم فانيـه
تجار سوق البورصه عان ارصدتها في جنيف=ما اقول غير الله يبارك في الغصون الدانيـه
كبتن عتيبه
أنته بعصر ابن سعود ..ولا انت في عصر الشريف=عصـر التطـوّر يارحيّـم طــوّر البدوانـيـه!!
واليا بغيّت الصيف والمصيـاف عانـه فالمصيـف=تعطّر مـن الـورد وأكـل الخـوخ والرمانيـه!!
رحيم الغنامي
عصر التطور طافك و حدّك على حيد الرصيف=وين انت عن عصر التطور وانت في الضلعانيه
الطايف المانوس دار الكيف و الجـو اللطيـف=غلاه مستوزيـه مـا بيـن الضلـوع الحانيـه
كبتن عتيبه
ماهو بعيب الضلع واللّي يسكن الضلع المنيف=احسن من اللي يارحيّـم يسكـن المسلانيـه
ياصاحب العقل الرزين وراعي الدم الخفيف=شيـخ القبيلـه مايقفّـل دونــه البيبانـيـه
رحيم الغنامي
الله يبارك فيك مار الضلع مزبـان الضعيـف=وانته شجيع و في المواقف تنطـح العدوانيـه
اثرك من عتيبه و انا كنت احسب انك من ثقيف=لكنّ سرّ القاف و اسـر الليـل يـا سرحانيـه
كبتن عتيبه
ترى الجبال ذيابها ياصاحبي تهرف هريـف=والا السباع الثانيه تنـزل مـع الوديانيـه
كل شي شككبه يكود الرمح والسيف الرهيف=ومناحي اللـي يذبـح الشعـار بالقيفانيـه
رحيم الغنامي
نبا ندوّر للقضيه حـلّ مـار الحـل كيـف؟=و الكبتن مناحي نشيط و يطمـر الجرفانيـه
عانه من السيل الكبير لحفر كشب اليا العطيف=سيفه حديد و يذبـح الفرسـان بالالحانيـه!