[عيد العازمي]

الشاعر سداح الغنامي العتيبي


شاعر كبير يملك من سحر الحرف مالا يملكه الا القليل من شعار جيله

قصيدته التالية شدت انتباهي جداً وانتجت خاطرة مني بالاصح وليست مجاراة

لأن الشاعر / سداح استاذ وقدوة فيصعب علي مجاراته

سداح يقول ::

يادافـع الشعـر لاتنسـاق مـن دونـي=مادمـت فـي ذمتـي سـج القـدم فيـه
خلـك علـى نيتـك وظنونـك ظنونـي=وانـا ماغيـر عليـك الظـن والنـيـه
البارحـه مـرت الاحــلام بعيـونـي=احلام سـوداء ماهـي باحـلام ورديـه
امسيت اصوت لها واصبحـت مغبونـي=تفسيرهـا بـيـن هـاذيـه و هـاذيـه
لو تستحي دمعتي من ضحكـه سنونـي=ماكـان حطـت بنـون العيـن ماريـه
اللـي تناسيتوهـم والـلـي تناسـونـي=بالخيـر مذكـوره وبالخـيـر منسـيـه
والحب لاهز صـدري حـرك شجونـي=حطبت حـدب الضلـوع ونارهـا حيـه
اكثر جروحـي سببهـا اللـي يحبونـي=جـرح الحبايـب عطيـب وكيتـه كيـه
تبكي على راسي وتضحك على متونـي=ونفضت خرجي وطـاح الـداب والحيـه
وين انت ياللي عليـك اكوسـر لحونـي=وهيجنت باسمك وشلـت اغلـى هجينيـه
يوم انت حدسي و رسمي واصدق ضنوني=من لامنـي فـي غرامـك لعنبـو حيـه
ياسيـد الحـب معـك الحـب مامونـي=وانـا علـى جرتـك عينـي شقـاويـه
مجبور لاشفتنـي ماشـي علـى هونـي=حاولت وازريـت لاكسـر قيـد رجليـه

وهذه الخاطرة:: اقول فيها ..........

سداح بيّحت خافي كل مكنوني=اثر جروح المهاوي باقيه نيه
حرّك قصيدك جروحي واظهر اطعوني = اللي عن الناس مكتومه وسريه
وانساق هاجوس شعري معك ممنوني =وانتج قصيده على ماقيل رديه
فيها من الوجد والتنهات مليوني= على وليفٍ عديم الوصف موليه
اقفى وسر الغلا بالقلب مصيوني = مصيون ماطاح بـــِيدين الهواويه
خلّيت ذكرى السنين العوج ماعوني = تشيل قصة غرامي روحه وجيه
واليوم وقّفتها واظهرت مخزوني = لو المعاناه ميتينه على ميه
عليه ثوب السعاده جزم مخبوني = اسلوك يوم الوصل بالحزن ملويه
شدّيت حبل الرجا والحبل مقروني = واقرع رشايه بعد ماعقّب الطيه
واليا سحبت الرشا ياناس ,,مالوني = الدلو بالصد والهجران ممليه
والبعد نار ورضيته مار خلّوني = طاريه لازال لو يموت طاريه
يحرقني الصمت بين الطرف والنوني = ويقتلني البوح بعيون السنافيه
لاواعذابي ,ومشكايه وياعوني= بالضبط عشر سنوات الهجر هجريه

اخوكم/ عيد العازمي

التوقيع

ليت الافكار مركب والهواجيس مينا=كان ماسج ريمه غير ركّاب ريمه!! العازمي