[نايف العبيد العتيبي]

بسم الله الرحمن الرحيم

\

يقول بريك بن محمد ( بيطار الشعر ) :

يقول الساعدي هذب حصانه = بحد الغف من يمّة غبيّه
لقيت اليوم عند الناس حق = نوايا الخير يجزونه بسيّه

ويقول الفارس المشهور حمود بن مقرّب :

يقول ابن مقرّب وانا حمود = لطرق المرجله والعرف واعي
أنا من ساعدة ذهب(ن) مصفىّ =أهل صحون وطعون(ن) وساعي

ورحت اقول وعمر السامعين يطول :

يقول الي جفاه النوم واعي = غشاه الليل مفرود الذراعي
سلايل ساعدة ذروة هوازن = معشّية الضواري والسباعي
أدوّه بالخلا لديار ربعي = صفاة يحدها طعس(ن) وقاعي
آجيب البيت تلو البيت وانحت = على الصفيان ماخطّه يراعي
تحن العيس من قولي وتسجع = وتلعي الراعبيّة لستماعي
اجاري بريك بيطار القصايد = وابن مقرّب حمود الشجاعي
قصايدهم يشوش الراس منها = أهل قصور وحصون وقلاعي
لقيت الشعر من غابوا بحادر = وغاب الشعر والموروث ضاعي
آخايل دنيتي وآمد شوفي = واسوق الرجل بفجوج(ن) وساعي
وانا مااتبع هوى من لا هواني = ولا ادهل مجلس(ن) من غير داعي
عزيز(ن) من شغاميم(ن) عزيزة = رفيع(ن) من مواكير(ن) رفاعي
وأنا ماعطي العطيه ثم أمنّه = ولا أجزي السرسري صاع(ن) بصاعي
نجوس(ن) بالخفى دوم اتحكيبي = سرابيت(ن) تبي تطفي شعاعي
إلا من غبت قالوا بي وقالوا = وليث الغاب ماهاب الضباعي
اخصر الحاقد النماّم وآطى = على روس العقارب والأفاعي
وأنا ماخون عهد الله لله = عفيف النفس مسموع(ن) مطاعي
على الجيران محمود السجايا = اداريهم وهذا من طباعي
دخيلي في أمان الله يبقى = عظيم الشان ممنوع(ن) مناعي
عدوي هو عدوي لو شناني = فلا ابخسه لو حاول نزاعي
وزماني لو جفاني وامتحنّي = مدايده القديمه لي متاعي
وأنا ماناصح اللي ماشكالي = دني النفس ودّه بانخضاعي
وأنا ماصدّق العياّل حتى = لو يسعالي في شتّى المساعي
أحدّه وادحمه عني واردّه = ولا اسمح للحرايب باندلاعي
وأنا مجزع ليامن شفت كربة = مصير الضيق يقفاه اتساعي
تماكن يافتى زهرة شبابك = قبل الموت ينزعك انتزاعي
وسارع بالثلاث قبل الثلاث = وحاذر دنيتك كلّه متاعي
ولو تعطى عمر نوح وشعيب = حبل العمر اتلاه انقطاعي
ولكل غربه ولوطالت نهاية = ومصير الحي بالحي اجتماعي

وسلامتكم ,,,


للحفظ ... اضغط هُناا