ياحمود نزل من حطب كشب دفعات = فالرقه اللي دون بيت الحداري
عرنٍ حمر يسرج ليا عشر ساعات =نجذي عليه دلالنا والغواري
نبا انّظم فوقهن شعر وابيات =يطري عليه من حياتي طواري
خمسين عام اللي مضت كن ماجات =لاتجرتن عندي ولامن مصاري
واحذر زمانٍ طالعٍ فيه اشارات=غفلة شباب وصاحي القلب داري
كثرت ذنوب الناس في كل حزات =ويطلع فسادٍ فالبحر والبراري
والحرب باقله على الناس ويلات =مثل المعاصي يذهبن الذراري
حافظ على دينك وخمس الصلوات =واحذر تدخل بين بايع وشاري
واخذت لي في نجد اناسه وجولات =واليوم طبق دفتري مثل غاري
وان مت قبري خابره يم سفوات=ولا ادفنوني عند بير الكعاري
في عبلةٍ بين الهضاب المنيفات =قبري خلا تذري عليه الذواري
من شان يطاني من البدو مرات =يدعولي ولا يجي في طاري
وبديارنا ياحمود حيين واموات =مسكانّا فيها ومن مات ضاري
ياما مكثنا يمها من سنوات=منزالنا فالقاض ولا الصفاري
ويوم الحياه الطيبه والرغانات =تلقا الضبا فيها وجول الحباري
وياما دفعنا من عشاير وخلفات =يوم اصطفاق البدو فوق الخباري
ملحٍ تصدر من خباري العبيدات =تسمع هدير جمالها فالغداري
وان كثروا العربان ولا الغنم جات =سقنالها المقهور فارضٍ قفاري
وان دكو الزمل الضحا والدبش بات=راع الغنم ماله نصيبٍ مباري
عسولهم قفرٍ يجي خمس شدات=ماتسمع الا فيه حس الزواري
للشاعر / دحيــــم بن رشيد الغنــــــــامي