السلام عليكم ورحمة الله وبركاته
يسرني أن أطرح بين أيديكم هذه الأبيات المتواضعه
وأتمنى أن تنال على اعجابكم
يا اهل البيوت الطارفه وادعونـي=كلمة فمـان الله يـا كبـر أثرهـا
في نفس من دمعه يبلّ الجفونـي=ينسى بعض همّه ليامـن ذكرهـا
عفت المنازل يوم أهلها جفونـي=وسجّيت رجلي حايرٍ في سفرهـا
دربي طويل ورفقتـي همّلونـي!=رحّـال وعيونـي تلـدّ بنظرهـا
يزمي سراب القيض بالحزم دوني=وخْطَا المقفّي تبعـده لوقصرهـا
ياطير ياللي فوق جرد الغصونـي=نفسك ونفسي مالها عـن قدرهـا
اللي حدوبـك للمفـارق حدونـي=وش الْك في ديارٍ يبوسٍ شجرهـا
ارحل معي وامّا دعوك ودعونـي=ولاّ ترى العشّاق حمـرٍ جررهـا
راحوا ولدري عقب راحوا يجوني=ولاّ الليالي ناشهـم مـن كدرهـا
طبع الليالـي مخلفـات الظنونـي=يقوله اللي قد سراهـا وسهرهـا
كله لعينـك يـا كحيـل العيونـي=أطلب وصالك ما حسبت لخطرها
وان كان تاليهـا عليكـم يهونـي=رجاي في من لو تكسّـر جبرهـا
يمكن مع غْيابي زمـن تذكرونـي=يجبر عزايـه ساعـةٍ منتظرهـا